Shillong, Risaw 07 : U nongaiktien ka Sorkar MDA bad Myntri Sorkar Bah Wailadmiki Shylla ha ka sngi Balang ula ong ba ka Sorkar Jylla ka sngewkhia bha halor ka jingdon ki shnong ki bym pat pyniasoh surok bad ka jingktah ia ka kabu ban ioh ia ki lad jingshakri ha ka koit ka khiah, hynrei ula ban jur ba ka jingkyntur ia ki jingtei kala long lypa ka jingshimkhia ba hakhmat duh.
Haba kylli la ula iakren halor ka jingktah ka jingbym biang ki surok ia ka jingshakri ha ka koit ka khiah bad u Myntri Rangbah, u Bah Wailad ula jubab “Peit, kam dei eh tang namar ba ngi ap ia ki jingjia ba kin jia. Kumba nga la kren ha ka sien iakynduh ba khatduh bad ki lad pathai khubor, naduh ba ngi ioh la ka jong ka Jylla, Nga tharai ha kine ki 7-8 snem, ngi la pyntrei bun eh ki surok”.
“Hynrei kumba nga ong, ngim lah ban leh lut shisien leh ia baroh namar ngi don bun ki jaka ba kongsan kaba ngi hap ban khmih” ula bynrap.
Haba iai ban ia ka jingthmu ka Sorkar, u Myntri ula ong “Ka Sorkar ka sngewkhia jur bha bad ngi la pyrshang kat kaba lah khnang ba baroh ki shnong ki bym pat don surok kin sa iasoh noh da ki surok kiba paka. Kam long kaba suk ban leh lut ia kiei kiei baroh shisien leh. Khlem pep, ka Sorkar ka pyrshang kat kaba lah ban pynthikna ban pynpoi surok sha baroh ki shnong ki bym pat don surok”.
