Shillong, Risaw 07 : Ka NPP kam shym la duhthiah duh dem halor ka jingnang kiew u nombor ka BJP hapoh ka Iingdorbar Thaw Ain ka Jylla, ong u nongialam ka NPP bad Myntri Sorkar Bah Wailadmiki Shylla ha ka sngi Balang haba pynpaw ba ka liang synshar ka dang iatylli kawei bad dang khlain shuh shuh.
Haba kylli la ka NPP ka duhthiah duhdem mynmiet ba nang kiew ka BJP, u Bah Wailad ula jubab “Em, Ngam tharai satia”.
Ula ong ba ka jingialang ba long ha ka miet sngi ba-ar la pynman bakla kum ka jingialang ba kyrkieh.
“Dang hynnin ka miet ngi la iashong jingialang hynrei ka jingialang kam don eiei kaba thymmai. Ngi la ju leh ia kane da ka jingiakynduh shisien ha man k alai bnai. Kumta, ka jingialang hynnin ka miet ka dei shibynta jong kane, kaba ngi iashong para ma ngi bad iakren ia ka synshar khadar bad kiwei kiwei ki kam” ong u Bah Wailad.
Halor ka jingiakynthih seng ba dang shen, ula ong “Ha ka sain pyrthei, ki jingkylla kin don beit. Kumta ngim don eiei ban ong palat ia kata”.
U bah Wailad ula kdew ba ka jingkynthih seng ki MLA ka dang iai long hi tang hapoh ka kynhun synrop kaba synshar ia ka Jyla.
“Ka jingkynthih seng ka dei na ka Sorkar sha ka Sorkar ym na ka Sorkar sha ka Liang Pyrshah. Kumta, ka NPP kam shym la duhthiah duhdem” ula ong.
