Dibrugarh, Nailur 6: Ha ka jingtohkit kaba dang ïaid shakhmat halor ka jingsuba kam khaii bad set beaiñ ïa ki khynnah, ki Pulit ka Namsai ki la lap bad ioh pyllait haduh 38 ngut ki briew, kiba kynthup ïa 34 ngut ki khynnah bad 4 ngut ki rangbah, na ki jaka bapher bapher jong ka Arunachal Pradesh.
Ka jingtohkit ka dang iaid ha kaba iadei bad ka Namsai P.S case 54/2026.
Ïa kane ka kam la tohkit da u Deputy Superintendent of police u Kengo Dirchi, Investigating Officer, hapoh ka jingpeit jong u Sangey Thinley uba dei u Superintendent of Police ka Namsai District, ryngkat ka jingïatreilang bad ka jingkyrshan kaba jan na ka Child Welfare Committee (CWC), Namsai, bad ka District Child Protection Unit (DCPU), Nasai.
“Katba ka jingtohkit ka nang ïaid shakhmat bad ki jingïadei ki nang mih, la kem ïa kawei ka nongpynïaid ba kongsan, ka Rupali Padung, ha kaba ïadei bad kane ka case, kaba la pynlong ïa ka jingdon jong ki briew kiba la shah kem sha ka saw ngut.Ka bynta ba la kynnoh jong ka, ryngkat bad ki bynta jong kiwei pat ki briew kiba ïadei bad ka jingkit bad jingbuh ïa ki lanot, ka dang shah tohkit katkum ka aiñ”.
U la ong, “Ka jingtohkit ka dang ïai bteng ban pynskhem ïa ka jingïadei kaba pura jong ki nongpynïaid, ka jingkit bad jingbuh ïa ki lanot, ka jingpynïaid pisa, ki sakhi lyngba electronic evidence bad kiwei kiwei ki jingïadei kiba ïadei bad kane ka case,”.
“Ki briew kiba ki khynnah, ba ki don la kynnoh ba la buh bad kumjuh ruh ïa ki kmie ki kpa, ki nongsumar kiba donkti, ruh ki dang shah eksamin kum shi bynta jong ka jingtohkit.La pynshisha ia ki bynta bad ki jinglong jingman jong ki shimet shimet, bad la sdang ia ki kam ain kiba donkam ha kano kano ka jaka halor ka nongrim jong ki sakhi,” u la ong.
Ka CWC, Namsai, bad ka DCPU, Namsai, ki la pynjlan ia ka jingiatreilang bad jingkyrshan kaba donkam ha kaba iadei bad ka jingsumar, jingiada, jingai jingmut, jingpynbha bad jingbha jingmiat jong ki khynnah ba la lap ha ka por ba tohkit.
Ki Pulit jong ka Namsai ki dang ïai bteng ban aiti lut ban ithuh ïa ka network baroh kawei bad ban shim ïa ki sienjam kiba biang pyrshah ïa uwei pa uwei u briew uba la lap ba donkti ha ka por ba tohkit, katba ki dang pynthikna ïa ka jingshngaiñ, ka burom bad ka jingpynbha ïa ki lanot.
Ia ki jingtip ba kyrpang bad ki jingtip ba bniah jong ki khynnah la buh rieh katkum ka ain.Ka jingtohkit kaba kham bniah ka dang iaid shakhmat.
