Shillong, Naiwieng 08: Ka Joint Action Committee Against Shillong Ropeway Project ha ka sngi Saitjain, kala dawa ba u Myntri ki kam jngohkai bah Paul Lyngdoh u dei ban hiar shuki noh lad aka Sorkar kam lah ban pynkynriah ia ka ropeway project na Lum Shyllong.
Haba kren sha ki lad pathai khubor ha ka sngi ba-ar jongka jingiashong kyllain mungor, ka Executive Member ka JAC Kong Anita Kharmawphlang kala ong ba ka jingiakhih kan iai bteng tad haduh ba ka Sorkar ka long kaba kloi ban pynkynriah ia ka project sha kiwei pat ki jaka.
“Phidei ban pynkynriah ia ka ropeway lane phin pynbor ia ngi ban dawa ba u Myntri kam Jngohkai u dei ban hiar shuki” ong ka kong Kharmawphlang.
Ka iathuh ba bun ki riew tynmen ba hapdeng 60,70 bad 80 snem kila wan iashimbynta ha kane ka jingiakhih bad kyntait ban leit shala iing wat hapdeng ki jingpyrshah ki khun ki kti.
“Watla ki khun jong ki, kim shym la shah ia ki ban iashong kyllain mungor hangne, kila rai kut ba kin ym leit phai shala iing. Lada jia eiei ia ki, ka Sorkar kan hap ban shim ia ka jingkitkhlieh, kan hap ban pyrkhat bha ia kaei ka ban jia ia ki” kala ong.
Halor ka jingpynbeit ban sahmiet, ka kong Kharmawphlang kala ong ba ka Committee kan sa pyntip lyngba ki lad pathai khubor, bad ki briew na kiwei ki shnong kin sa pynbeit ia ka jingsahmiet kat kaba ki sngewmon.
“Lada ki briew ka Sorkar ki don kmie, ki dei ban pyrkhat bha” kala ong haba kynnoh ia ka Sorkar ia ka jingsngap jar jar naba ym shym la don mano mano ruh ban wan shakhmat ban ai jubab ia ki jingdawa jong ki.
Kala ong “haduh mynta, ka Sorkar ka la sngap jar jar, kam pat ai jubab, ym pat don mano mano ruh kiba wan shakhmat” kala ong bad bynrap “U Myntri kam jngohkai ula leit shabar ri, kata ruh da ka pisa u paidbah”.
Haba pynpaw ba ki nongiakhih kin ym kynran dien, ka kong Kharmawphlang kala ong “Ngi ruh ngi ieng skhem ha ka nongrim ba ngin pyniaid beit shakhmat, ngin ym sangeh, ngin aiti wat iala ka jingim, ngin ym kynran dien da lei lei ruh”.
“Ngi dawa ia ka Sorkar ban pynkynriah ia ka ropeway sha kiwei pat ki jylla, ym ha Lum Shyllong. Kila jied ia ka jaka kaba bakla” kala ong.
