Shillong, Naiwieng 08 : Ka Hynniewtrep Achik National Movement (HANM)ka East Khasi Hills ha ka sngi Saitjain kala leit ban wah banner ha kylleng ka sor Shillong-kynthup ha ka khyrdop ka bungalow u Myntri Rangbah Conrad K Sangma bad khyrdop ka Assembly Secretariat- haba kynnoh ia ka Sorkar ba kala pheil halor ka ILP, jingpynkynriah ia ka Them Metor bad ka kam iakajia khappud.
U President ka HANM-EKH Felso Jarain ula ong ba kane ka jingleit wah banner ka dei ka jingpyrshah beit beit ia ka jing bym leh eiei jong ka Sorkar.
“Na ka bynta ka HANM-EKH, ngi la leit wah ia ki banner ha kylleng ka sor Shillong kum ka dak ka jingpyrshah ia ka Sorkar namar ka jingpynslem ban pyntreikam ia ka ILP, ka jingbym lah ban pynkynriah ia ki briew na Them Iew Mawlong bad halor ka kam iakajia khappud” ula ong.
Halor ka ILP, ula ong ba ka Sorkar kam lah ban kam ba kam don jingtip eiei halor ka jingdawa.
“Ngi la iohi ia ka Sorkar ha u 2018 bad 2023 ba kila mynjur ia ka resolution ha Iingdorbar Thaw Ain, ha kaba baroh ki 60 ngut ki MLA kila iasoi ia ka resolution halor ka ILP” ula ong bad bynrap “Na ka por sha ka por, ka seng jong ngi kala pyn kynmaw ia ka Sorkar halor kane ka jingdawa kaba la ktah ia ki paidriewlum trai muluk”.
Kane ka ain ka dei kaban iada ia ngi, ki riewlum trai muluk, kiba dei ki rit paid ha India.
U iathuh ba ka HANM kala rah ia ka jingiakhih wat sha Delhi, haduh arsien, hynrei kala wan phai thylli.
“Na ka por sha ka por, ka seng jong ngi kam shym la shong kli kti bad kala leit dawa la arsien ia ka ILP sha Delhi, hynrei ka Sorkar India kala leh kyllut ia ka jingdawa jong ngi” ula ong.
“Kiwei ki Jylla kum ka Nagaland bad Mizoram kila ioh ia ka ILP, balei ka Jylla jong ngi kami oh?” ula buh jingkylli bad ong “Ngi kwah ban kylli ia ka Sorkar ba shaei kata ka jingkular ka poi, ne hato kajingkular ka long tang ban myntoi ialade khnang ban jopelekshon”.
Halor ka Them Metor, u iathuh ba ka jingdawa ka long ba ka sorkar ka dei ban leh eiei noh mynta, ym hadien.
“Ha Them Iew Mawlong, ki Harijan kila pyni bor bha, hynrei haduh mynta ka Sorkar kam shym la lah ban leh eiei” ula kynnoh bad bynrap “Ngi sngew ba lah ban don kaei re kaei sha lyndet kane bad kane kala pynsuba jur ia ngi, namar ki briew kiba wan trei ha Jylla jong ngi kidon kiba kyrshan ha lyndet jong ki”.
Halor ka khappud, u ong ba ka por bala buh hi da ka sorkar kala kut. “Ha ki bnai bala leit, ka Sorkar ka ong ba kan pynbeit ia ka jingiakajia pud hadien ka elekshon ha Asam, hynrei haduh mynta ym pat shym la lah ban pynbeit ia u pud u sam” ula ong.
“Sa katno ngut ki mnsem briew kin hap ban duh bad sa katno tylli ki longiing kin hap ban im hapdeng ka jignsheptieng namar ki jingjia thombor da ki briew na bar kiba sah ha khappud” ula buh jingkylli.
