Sngewsih ba ka party ba kha na ka jingiakhih Hill State kan hiar sha ka 1-2 MLA
Shillong, Nailur 06 : U nongialam ka United Democratic Party (UDP) Bah Paul Lyngdoh ula ong ba ka party jong u (UDP) kala nang ngam hadien ba weng noh ia u na ka Kynhun Myntri ka Sorkar Jylla.
Kane ka jingkynthoh kala mih hapdeng ki jingmih ki khubor ba 9 ngut na ki 12 ngut ki MLA kila pynkhreh ban leit iasoh noh sha ka BJP.
“Kumba nga ong ha kato kawei ka sngi, bun ki MLA kila iakren bad ki nongialam ba hakhlieh ka BJP. Kane ka pyni ba ym kiei kiei kiba iaid beit iaid ryntih hapoh ka UDP” ong u Bah Paul, MLA ka West Shillong constituency.
Une u Myntri Sorkar barim ula ong ba ki MLA ka UDP ki bunkam ha ki kam pynroi ha ka por jong u ba dang bat ia ka shuki Myntri.
“Ha ka por ba nga dang don ha ka Kynhun Myntri. Nga pyrshang kat kaba nga lah ban trei kam. Kane ka mut ba ki MLA ka party ruh ki iabunkam lang bad bun ki project bad ki skhim la wanrah ha ki constituency jong ki. Hadien kane, phi iatip lut ia kaei kaba jia” ula ong.
U Bah Paul ula bynrap “Kan long kaba bakla na ka liang jong nga ban iaroh ialade, hynrei kaei kaba jia mynta ka pyni ia ka kyrdan kaba ka party kala ngam”.
U ong ba ka long kaba sngewsih ban iohi ia ka nusib jong ka party kaba la kha na ka jingiakhih Hill State.
“Kum u champion ba don ia ka mynsiem riewlum, Nga shem ba ka long kaba sngewsih shibun ba ka party shisien ka por kaba iasoh bad ka jingiakhih Hill State kala mad mynta ia ka jinglong ban hiar ha ka jingdon ki MLA satang 1-2 ngut. Ngam kwah ban kynnoh ianp iano ruh halor ka jinghiar ka UDP” ula ong.
Haba kylli la ka UDP ka donkam ia u nongialam thymmail, ula ong “Kata ka jingbishar ka dei ban mih na ki fourth estate (lad pathai khubor). Kum ha ka jingialehkai ka Langsning FC, u rang ialehkai um lah ban batai ia ka rukom ialehkai jong u. Dei u coach bad ki nongpeitkai kiba lah ban bishar ia ka jingtbit jong uwei pa uwei u rang ialehkai”.
