Kohima, Nailur 3: Ka sorkar Nagaland ka la pynsangeh shuwa ban wanrah ia ka kaiphod jong ka committee halor ka jingpyntreikam ia ka Vande Mataram ha ka Jylla katba dang sahteng ka Prevention of Insults to National Honour (Amendment) Bill, 2026, haba kyntu ia ka Naga Students’ Federation (NSF) ban pynsangeh noh ia ka jingiakhih kaba dang iaid shabar jong ka Nagaland Legislative Assembly.
U myntri ka tnad bording bad Parliamentary Affairs u K.G. Kenye, uba dei u chairman jong ka Committee to Examine of Applicability of Laws ba la mynjur da ka Parliament, u la pynsngew ia kane ka rai ha ka shithi sha u President ka NSF u Mteisuding Heraang ha ka sngi Palei.
U Kenye u la ong ba ia ka rukom rwai da ki tiar jong ki ar tylli ki lain ba nyngkong jong ka Vande Mataram la pynsawa ha ka por ba wan bad leit noh u Lat ha ka 2 tarik u Lber, ka sngi sdang jong ka Dorbar ba phra jong ka 14th Nagaland Legislative Assembly, da kaba bud ia ka hukum treikam jong ka Ministry of Home Affairs kaba la pynmih ha ka 28 tarik u kyllalyngkot 2026.
Hadien kata, la pynpaw da ki nongthaw ain ia katei ka mat bad la phah sha ka committee, kaba la pynlong jingialang ha ka 18 tarik u Lber, 18 tarik u Jymmang bad 24 tarik u Jylliew shwa ban pdiang ia ka kaiphod jong ka.
Ia kane ka kaiphod la buh ban wanrah ha ka iing dorbar kaba dang iaid shakhmat. Hynrei u Kenye u la ong ba la bat hadien ba la mynjur ïa ka Prevention of Insults to National Honor (Amendment) Bill, 2026, da baroh ar tylli ki ïing dorbar Parliament bad la ap ban pynmih ha ka Gazette of India.
“Ka committee ka la rai, namarkata, kum ka lad ba shipor, ban bat ia ka Kaiphod tad haduh ban da tip ia ka jingmih kaba khatduh jong katei ka Bill ba la kdew haneng,” la ong u Kenye.
U la bynrap ruh ba ka committee kan sa bishar biang ïa kane ka kam katba ka dang shim khia ïa ki “jingmut bad jingsngew jong ki paidbah ka Nagaland”.
Hadien la kyrpad ia ka NSF ban pynsangeh noh ia ka jingiakhih kaba jai jai kaba dang iaid shabar ka khyrdop jong ka iing dorbar thawain.
