Shillong, Nailur 03 : Ka Special Investigation Team (SIT) ka Tnad Pulit, kaba la thung ban tohkit ia ki kam thombor ba jia ha ka rally thuk thuk ka KSU ha ka 19 tarik Nailar, kala kem sa ia uwei u nongialam kane ka seng, kaba pynkot ia ka jingkem sha ka san ngut.
U Superintendent of Police ka East Khasi Hills Bah Vivek Syiem haba iakren bad ki nongthoh khubor ula iathuh ba une u nongialam ba dang shu kem u dei u Samuel Kharbani jong ka KSU Nongmensong Unit. La kem ia u ha ka sngi Palei hadien ka jingpynshisha ia ka jingdonkti jong u ha ki kam thombor.
Arngut ki dkhot ka KSU na Nongmensong kila shah khot hajir sha Mawdiangdiang Police Station haba iadei bad ka jingiakhih pyrshah ia ka jingtei mandir hapoh ka phyllaw ka Ophis CBI.
Katba ka jingshim jingthoh ia ki jingbatai (statement) jong ki ka dang iaid, ka SIT kala shong bishar ia ka bynta jong ki ha ki kam thombor ba jia ha ka 19 tarik Nailar, ong u Bah Vivek.
“Hadien ba pynthikna haka por ba tohkit, ia u Samuel Kharbani la kem noh da ki Pulit. Ki Pulit kim shym la lap eiei ia ka jingdon bynta u Celestine Lyngdoh bad kumta la pynlait noh ia u” ong u SP.
Shuwa kane ka jingkem, ki Pulit kila kem ia 4 ngut ki nongialam ka KSU namar katei ka jingjia ba 19 tarik Nailar, kaba lam sha ka jingshah thang artylli ki kali, shah pynjulor 31 tylli ki kali bad shah shoh haduh 16 ngut ki briew.
