Shillong, Nailur 01 : U Symbud Myntri Rangbah bad President ka NPP Meghalaya, Bah Prestone Tynsong ha ka sngi Ba-ar, ula ong ba ka Sorkar Meghalaya Democratic Alliance (MDA) kam don jingma satia halor ki khubor ba 9 ngut ki MLA ka UDP ki don jingthmu ban leit iasoh sha ka BJP.
Ula ong ba tang ka NPP marwei ka don bun paid eh bad ka lah ban synshar marwei ia ka Jylla.
U Bah Prestone ula ong ba ula iohi ia ki khubor tang ha ki lad pathai khubor bad ia kane ka kam ym pat wanrah satia sha ka jingtip ka kynhun synrop.
“Nga la iohi tang ha ki kot khubor. Ngi ju don jingialang man ka por jong ka MDA. Lada don kino kino ki ishu ba iadei bad ki constituency jong ki, ngi long kiba kloi ban iakren bad iasam jingtip. Man ki paralok ha ka MDA ki ju wan kren ia nga, ia u Myntri Rangbah bad ia u Bah Sniawbhalang Dhar bad ngi ju pynbeit ia ki. Ngam iohi satia ban don kano kano ka jingeh” ula ong.
Ula ong ba ki khubor lehse ki pyni ba ki don jingiadei bad ki kam pohiing bad ki jingiashrut hapoh ka UDP.
Haba kylli la kan don jingktah ia ka NPP, u Bah Prestone ula ong ba ka Sorkar ka skhem ha ka jing don u nombor.
“Ka jingdon paid jong ngi marwei (NPP) ka long haduh 33. Ngi donkam 30-31 ban thaw ia ka Sorkar, kumta ngi la tam ia u pud” ong u Bah Prestone.
Ula ong ruh ba ka NPP hi kan ym tuklar ia ki kam pohiing jong kiwei pat ki seng sain pyrthei.
“Ngim don eiei ban kynthoh halor kane namar ka dei ka kam iing jong ki bad ki jingsngewthuh shimet. Hynrei ka Sorkar hi ka long kaba khlain,kaba skhem bad kan pyndep ia ka samoi treikam ba pura haduh u 2028 bad palat” ula bynrap.
