Shillong, Nailar 01: Ka jingiaid lynti ba 14 snem ka National People’s Party (NPP) ka long kaba eh bha, hynrei ka dei tang ma ka kaba nud ban tuklar ia ki ishu kiba ki Sorkar barim ki kiar, ong u President ka NPP-Meghalaya bad Symbud Myntri Rangbah Bah Prestone Tynsong ha ka sngi Ba-ar.
Ula kren ia kane shabar ka jingrakhe ia ka sngi seng ia ka NPP, kaba iatakahuh bad ka sngi kha jong u nongseng ka party (L) Purno A Sangma.
“Ka jingrakhe ba 14 snem mynta ruh ka jia ryngkat ba dei ka sngi kha jong u nongseng jong ngi (L)Purno A Sangma. Lada nga kynmaw, kine ki 14 snem ki dei kiba ngila mad shibun ki jingeh, khamtam hadien ba ngi shimti ia u lakam ban synshar ha u 2018. Kadei ka samoi ba nyngkong ia ngi ba ngi iatreilang ban pyniaid ia ki kam jong ka Meghalaya. Da ka jingkyrkhu u Blei, Ngi la long kumne kumba long mynta. Ngi la nang san bad nang kham rangbah ha kaban ialeh ia ki jingeh” ong u Bah Prestone.
Ula ong ba ka Sorkar MDA ba ialam da ka NPP kala shimkhia ban leh eiei halor ki ishu kiba bun kiba la sahteng jong ka Jylla naduh u snem 2018.
“Naduh u 2018 haduh mynta, ngi la leh shibun kiei kiei. Ki don ki kam kiba kiwei ki Sorkar kim nud ban leh eiei, hynrei ngi la leh. Ngi la shimkhia ban pynbeit iaka iakajia pud. Wat ka Them Metor (jingtyrwa pynkynriah ia ka Them Metor na Iew Mawlong) ruh ka dang im haduh mynta. Wat ong ba ngi la klet ia ka. Ngin sa shong jingialang shen ban pynbeit ia ka, namar ka rai ka dei ban iaid kat kum ka hukum ka Iingkashari High Court naba kane ka mukotduma ka dang don hapoh ka Iingkashari” ula ong.
U Bah Prestone ula bynrap ba ki resolution halor ka ILP, ka ktien ka thylliej bad jingtih urankum ka pyni ia ka jingkut jingmut hok ka Sorkar.
“Phi la iohi ia ka resolution halor ka ILP, ka ktien ka thylliej bad ka jingtih uranium. Kin dang bun ki ishu ba kum kine kin sa nang wan. Kine kin nang pynkhlain shuh shuh ia ki paidbah ka Jylla da kaba phaikhmat kyrpang halor ka jingshngain bad jingiada ia ki paid riewlum jong ngi” ula ong.
