Pynkynmaw ia ka jingshah ktah ki Khasi-Pnar ha ka jingiakynad u snem 2023 ha Mizoram
Shillong, Nailur 01 : Ka Sorkar Meghalaya Democratic Alliance (MDA) ba ialam da ka National People’s Party (NPP) kan sa leit iakren bad ka Sorkar Pdeng ban pynkylla noh ia ka Presidential Order u snem 1950 bad ban bishar thymmai ia ka thup ki Schedules Tribe ha Meghalaya.
Ia kane ka pynbna da u President ka NPP-Meghalaya bad Symbud Myntri Rangbah ka Jylla Bah Prestone Tynsong ha ka sngi Ba-ar haba kren sha ki nongtrei ka NPP ha ka jingrakhe ia ka sngi seng ba 14 snem jong ka NPP bad ka jingrakhe sngi kha jong u Nongseng ka party (L) Purno. A Sangma.
U Bah Prestone ula pyntip ba ka Sorkar Jylla kala shim ia ka rai kaba khraw bha ha u bnai bala lah ban “peit biang ia ka tynrai” jong ka Jylla.
“Haba ngi ong ba ka Meghalaya ka dei ka Jylla riewlum, ngi pynshong nongrim ia ka halor ka Presidential Notification u snem 1950. Hynniewphew-hynriew snem kala iaid. Ngi la thaw mynta ia ka Committee, kaba ma nga hi nga khlieh, ban peit biang bad shong bisahr ia ka thup ki riewlum bad ki riewlum bynrap ha Meghalaya bad ban bishar mano ba dei hok bad mano ki bym dei” ula ong.
Haba pynkynmaw ia ka jingiakynad pher jaidbynriew u snem 2023 ha Mizoram ha ka por jong u Bah D.D.Lapang kum u Myntri Rangbah ka Jylla bad ma u kum u MLA ba dang shah jied nyngkong, u Bah Prestone ula ong ba bun ki paid Khasi-Pnar kiba sah ha Mizoram kila shah ktah jur.
“Nga iohsngew ia ka jingpang met bad jingsngew mong. Ki dei ki riewlum kum ma ngi. Ha Meghalaya, ngi burom bad ithuh ia ki riewlum Mizo bad ai ia kijuh ki jingmyntoi ia kum na kajuh ka pliang. Ha kajuh ka por, Nga iakynduh ia u Myntri ka Mizoram bad kylli ia u-lada ki briew jong phi ha Meghalaya ki lah ban iabam na kajuh ka pliang, balei ba ki briew jong ngi kim lah ban iohlang hangtei” ong u bah Prestone.
U DyCM ula ong ba dei halor kane ka nongrim bala thaw mynta ia ka Committee.
Haba pan ia ka jingkyrshan, u bah Prestone ula ong ba ka party kan pyntyllun shakhmat ia kane ka kam kat kum ka lynti ka ain bad ka riti synshar ka ri.
“Ngim donkam ban iakhih ha surok. Ngin ia peit ia ka ain. Ka pork an sa wan ban gin wanrah ia ka resolution. Lada donkam, ka Sorkar baroh kawei kan leit iakynduh ia u Myntri Rangbah Duh bad ka President ba kin pynkylla ia ka notification u snem 1950. Kane ka dei halor ka jingwanrah ia ka jingkylla khnang ba ki paid Khasi, Jaintia bad Garo kin nang khlain” ula ong.
U Bah Prestone ula ong ba ym pat ju don ki Sorkar ha ki 76 snem bala leit noh ki ban nud ban leh eiei halor kane ka kam.
“La 76 snem, ym don ba nud ban lamkhmat halor kane, hynrei hakane ka kynti ngin shimkhia ban leh eiei halor kane ka kam kaba heh bha. Ka dei ha ka mynsiem jong ka Sixth Schedule” ula ong haba air uh ia ka jingiaroh iaki sienjam bala shim da ka District Council bad ka Sorkar Jylla na ka bynta ki riewlum ha ri-lum Garo.
Ula kyntu ia ki nongtrei ka party ba kin trei shitom ha kane ka elekshon ban wan ka Shillong Parliamentary bad ong “To ngin ai ka jingjop ba don burom ia u Dr DRL Nonglait. Haba don ki ishu jong ka Jylla ki bym lah ban pynbeit, ngi hap leit sha Delhi. Lada ngi don iala u MP uba sngewthuh ia ngi, kan ai jingmyntoi bha ia ka Jaidbynriew jong ngi, ka Shillong Parliamentary Constituency bad ka Jylla baroh kawei”.
