Shillong, Nailar 31 : Ki nongiasaid ain ka Jylla ba kynthup ia ka High Court of Meghalaya Bar Association (MBA) bad ka Shillong Bar Association (SBA), kila shim rai ban sangeh treikam naduh lashai ka sngi ka 1 tarik Nailur ba mynthi ka Sorkar Jylla ban weng ia u Amit Kumar kum u Advocate General ka Jylla.
Ka MBA bad SBA kila shim ia kane ka rai ha ka jingialang Joint Executive Committee kaba long hynne ka sngi Nyngkong ha Shillong.
“Hadien ka jingiakren kaba bniah ia ki sienjam ban pynbud bad haba pyntreikam ia ka rai jong ka Joint General Body meeting jong baroh ki Bar Association ka Jylla ba long ha ka 24 tarik Nailar 2026, ha kaba ka Iing kala rai ba ka High Court of Meghalaya Bar Association bad ka Shillong Bar Association kin nang buddien ia ka jingdawa ban weng ia u Amit Kumar kum u Advocate General ka Meghalaya, ka Joint Executive Committee ka High Court of Meghalaya Bar Association bad ka Shillong Bar Association kala rai mynta ka sngi ba baroh ki nongiasaid ain kin sangeh treikam naduh ka 1 tarik Nailur” ong ka rai bala soi da u Secretary General ka HCMBA bad u Secretary ka SBA.
Ka ong ba ia kane ka rai la shim hadien ba ka Joint Executive Committee kala pynpaw ba wat hapdeng ka jingdawa kaba la mih hadien ka jingpynsniew ia ka burom, ka bha ka miat jong ka Bar, kiba mih na ki kam jong u Amit Kumar, ka Jylla haduh mynta kam shym la pyni ia kano kano ka mynsiem ban phah ktien sha ka Association bad ban leh eiei ia ka jingdawa.
Ka ong ba namar kata, ka Joint Executive Committee ka sngew ba kane ka dei ka sienjam kaba biang ban pynbor ia ka Sorkar ha kaban pynurlong ia ka jingdawa kaba dei beit thik na ka bynta ka jingbha jong ki nongiasaid ain jong ka Jylla baroh kawei.
Ka rai ka ong ba baroh ki nongiasaid ain kiba iakhun mukotduma ha baroh ki Iingkashari bad ki Tribunal ha ka Jylla Meghalaya, ki dei ban sangeh treikam naduh ak 1 tarik Nailur.
Ka ong ruh ba kane ka jingsangeh treikam kan bteng tad haduh ba ka Sorkar Meghalaya kala weng noh ia u Amit Kumar na ka Ophis Advocate General ka Jylla.
Hynrei kala ong pat ba kane ka jingsangeh treikam kan ym treikam tang ha ki kam ba iadei bad ka kam bah jamin.
 bad ka Shillong Bar Association (SBA), kila shim rai ban sangeh treikam naduh lashai ka sngi ka 1 tarik Nailur ba mynthi ka Sorkar Jylla ban weng ia u Amit Kumar kum u Advocate General ka Jylla.){kind=link}