Shillong, Nailar 27 : Ka Shillong Lajong FC, ka la lah ban pynliem ia ka Nongkseh SSCC da 1-0, ha ka Shillong Premier League 2026, ba long hynne ka janmiet ha SSA Stadium, Polo, kaba la pynkut syndon ia ka jingjop lynter taid jong ka Nongkseh ia ki jingiakhun mynta la jan arsnem.
Ka Nongkseh kam pat ju shah rem ha ki lympung ialehkai ka SSA naduh u Naiwieng 2024 bad kane kala kut noh hynne ka janmiet da ka penalty u Lalmuansanga, ha ka minit ba 55.
Ka Lajong kala pynliem ia ka Nongkseh ha ka lympung Durand Cup ha u bnai bala lah hynrei ka SLFC kala sei da kiwei pat ki rang ialehkai ha ki lympung ialehkai ka Ri.
Ka Nongkseh SSCC ha ka kylla miet, ka la ialeh ban nion borbah bad ngat ha kiba bun tylli ki foul, kaba pynlong ia u Hamedamanbha Wahlang bad Arlangky Nongsiej ban rung kyrteng ha ka kot u referee.
Ka penalty kaba ka Shillong Lajong FC ka la ioh kala wan lyngba ka handball na u Daraphun Talang.
Kat haduh ba kut ka kylla iakhun kaba lai jong kane ka lympung, ka kynhun ialehkai ka Mawlai SC ka bat ia ka kyrdan ba nyngkong bud pat sa ka kynhun ialehkai ka MLP FT ha ka kyrdan kaba ar, ka Shillong Lajong ha ka kyrdan kaba lai, hadien ba ki la ioh ba kin ia khur mar 7 point, tangba ka jingiapher hapdeng kine ki lai tylli ki klop ha ka long ha ka jingioh thep kol, ha kaba ka Mawlai +6, MLP +3 bad Lajong +2
Lashai ka sngi, ka Laitkor SC kan mih madan ban iakhun pyrshah ia ka lahduh jong kane ka lympung ka Langsning FC, kaba don mynta ha ka kyrdan kaba saw hadien ba ka la ioh ba kan khur 6 point, kane ka jingiakhun kan sdang ha ka por 3:40 nohphai sngi.
