Shillong, Nailar 27 : U Myntri ka Tnad Pule Puthi Bah Lahkmen Rymbui ha ka sngi Palei ula ther tyngeh ia ki nongkynthoh pyrshah kiba buh jingkylli ia ka jingkiew ki khynnah ba pass ia ka SSLC naka 50% sha ka 96% hadien ba pyntreikam ia ka CM-IMPACT.
Haba jubab ia ka jingiatai ia ka mat ba lyngkot bala wanrah da u MLA ka UDP na West Shillong, u Bah Rymbui ula ong ba ka Sorkar kam dei ban shah kynnoh namar ka jingiarap ia ki khynnah pule ba kin pass.
“Balei ba phi sngewsih haba ki khynnah pule ki pass? Phi don aiu ban shun pyrshah ia ki? Hato phi kwah ia ki ban fail” kylli u Bah Rymbui.
Ula pynksan ba katba ki khynnah pule ha Sor ki lah ban leit khrehkot, ki khynnah pule na nongkyndong kiba duk, ki donkam ia ka jingkyrshan ka Sorkar.
“Man ki dukan kot ki die ia ki kot ba pynmih da ki kompani shimet. Hato ki khynnah pule ka Meghalaya kim don ia ka hok ban ioh ia ka jingiarap? Lada ki sahklas shi snem, ki pep skul noh. Hato ngin kem ba kiew ka jingpep skul? Mynta ka jing pep skul shiteng por kala hiar sha ka 6.2% bad baroh ki sngew sih ia kane” ula ong.
U Myntri ula ong ba ka jingpynbha ia ka result ka tynrong ia ka jinglut ha ka Sorkar namar ka hap ban kyntiew kyrdan ia ki skul Secondary bad plie ia ki skul Higher Secondary bad ki College.
“Ka Sorkar kan pyndep iakaei kaba ka kular kata ban ai ia ka pule dangle kaba bha tam bad kaba lah ban ioh da baroh. Haduh 19 tylli ki College paidbah la dep ban mang na ka pla tyngka ka Jylla” ula ong.
Haba kyntu ia ki dkhot ba kin ai ia ki jingai jingmut kiba tei ha ka jaka ban kynthoh, ula ong “Ai jingmut ia nga kumno ban pynjanai ia ka CM-IMPACT, Ngan leh ia ka na ka bynta ka jingmyntoi ki khynnah pule jong ngi”.
Ula bynrap “Nga ai khublei shikatdei eh ia u Myntri Rangbah ba 19 tylli ki college paiadbah lah dep ban mang na ka pla tyngka ka Jylla na ka bynta ki samla ba kin ioh ia ka jingnang jingstad”.
