Maham u Bah Paul halor ka jingpyndonkam palat pud iaka kor digital hapdeng ki Khynnah

Ai jingmut ban pynlong ia ka jingwad bniah ha baroh kawei ka Jylla

Shillong, Nailar 27: Haba pynpaw ia ka jingsngewkhia halor ka jingbym don ka jingpyrkhing ia ka rukom pyndonkam ia ki mobile phone da ki khynnah, u MLA ka UDP na West Shillong Bah Paul Lyngdoh hynne ka sngi Palei, ula ong, ba ka Meghalaya kala sakhi ia ka “digital intox” ne pyndonkam palat pud ia ka kor digital watla ka pyrthei kala jam shaphrang ban ialeh ha kaban pynduh ia jingpyndonkam ia ki kor digital ne ka ‘Digital Detox’.

Haba wanrah ia ka Short Duration Discussion halor ka pule puthi ha ka iingdorbar thawain, u Bah Lyngdoh ula ong, bun tylli ki ri ha ka dewbah Europe bad Australia kila khang pyrshah ne ‘Banned’ ia ka jingpyndonkam ia ki mobile phone da ki khynanh hapoh ka 16 snem ka rta.

Mar khongpong ia katei, ula ong, ula iohi ia kawei ka Reel jong kawei ka khynnah skul na Shillong kaba don 8-9 snem ka rta kaba shad ha ki surok bad Mall bad ka don haduh 8,000 ngut ki nongbud ne Followers.

“Hynnin ka sngi, nga la kyndit ban iohi ia ka Reel kaba la shna da ka khynnah kynthei kaba hapdneg ka 8 ne 9 snem ka rta. Kala shad ha ki surok bad ha ki katto katne ki Mall, katto katne ki dukan, ka khynnah skul na Shillong hapdeng ka 8-9 snem ka rta bad nga la iohi ruh ba kala don 8,000 ngut ki Followers” ula ong.

“Kaei kane ka digital? Ha kaba iadei bad ngi, kam dei satia ka Digital Detox, Ngi dang leh ia ka Digital Intox” ula pynpaw.

Da kaba pynpaw ba ka lah ban ktah bha halor ka jingpynleit jingmut, jingbym thikna ia ka jinglong jingman, jingsngewsih, jingktah ia ka thiah ka dem bad jingkingkhlieh, ula ong, ba ki khynnah pule kila mad jingeh namar ba ia ki “Assignments” la phah ha ka phone jong ki kmie ki kpa bad ki khynnah ki pyndonkam ia ka phone ha ka dur jong ka jingpule.

Haba kdew ia ka jingwad bniah ha u snem 2025 da u D Passah ha Jowai halor ki samla pule ha ka higher secondary, ula ong ba ka jingpyndonkam palat pud ia ki Social Media kala ktah ia ka jingpynleit jingmut bad ia ka jingiadei shimet watla kala don ruh ka jingiohnong ha ka jingpule.

U Bah Lyngdoh ula kylli la ka tnad pule puthi ka don ia ki jingtip ne Data halor ka jingbym lah tehlakam ia ka rukom pyndonkam ia ka phone, internet bad social media hapdeng jong ki khynnah skul bad la kan pynlong ia ka jingwad bniah ha ka jylla baroh kawei ha sor bad nongkyndong ban pyniasoh ia ka jingpyndonkam ia kine ki kor ki bor bad ka koit ka khiah ia ka bor pyrkhat kumba la leh da ka jylla kaba marjan ka Assam.

“Hato ka Tnad ka don ia ki Data ha ka jylla ia ka jingdon ki khynnah skul ka Meghalaya kiba lah ban mad ia ka jingpyndonkam palat pud ne jingbym lah tehlakam shuh ialade ha ka jingpyndonkam ia ki phone, internet bad social media? Namar ba ka Meghalaya kam don ia ki jingtip kiba bniah ha kaba iadei bad ka koit ka khiah. Nga kwah ban buh ia kane ka jingkylli”.

“Hato ka sorkar kala shimkhia ne ka thmu ban tyrwa ban phah leh ia ka jingwad bniah kaban kynthup ia ki khynnah skul ha sor bad nongkyndong ban khmih ia ka jingiadei bad ka jingpyndonkam ia ki kor digital bad ka jingshah ktah ka koit ka khiah ha ka bor pyrkhat pyrdain?” ula kylli.

Ula kyntu ia ka sorkar ban iatreilang bad ka tnad ka koit ka khiah bad ki jaka pule ban iasyllok bad ban khmih bniah da kaba pyndonkam ia ki kor ki bor ban pynthikna ba ki kor digital ka mut ban pynkup bor ia ki khynnah bad ba kam dei ban ktah ia ka koit ka khiah bad ia ka pule puthi.