Ai jingmut ia ka rukom plan kat kum ka jingstad saian bad ba lah kyrda ha ki kam pynroi
Shillong, Nailar 27: U Nongialam ka Liang Pyrshah Mukul Sangma ha ka sngi Palei, ula ong ba ki jingshlei um ba dang shen, ki jingther kynsan u lapbah bad ki jingpynjulor ha Nepal, Uttarakhand, Himachal bad Assam, ka dei ban pynpeit mat ia ka Meghalaya ba kan shim ia ki lynti kat kum ka jingstad saian ha ka roi ka par bad jingpynkhreh ia ki jingpynjulor ka mariang.
Haba kren sha ki nongthoh khubor, u Mukul ula pynkynmaw ia ka Disaster Management Act, 2025, kaba la pynlong ain hadien ka jingiasyllok kaba sani bha hadien ki jingjia pynjulor mariang kynthup u jumai 1897.
“Ka ain ka batai kumno ka Northeast ka lah ban shah ktah lada kum kine ki jingpynjulor ki jia biang. Ka buh ba dei ban don ia ka Disaster Management Plan kaba bniah bha ha ka kyrdan jong ka Sorkar Pdeng bad Sorkar Jylla” ula ong.
U ong ba ka Meghalaya kala wanrah ia ka State Disaster Management Plan kaba don ia ki bor treikam kaba khlain- ki District Authority bala khlieh da ki Deputy Commissioner, State Authority da u Myntri Rangbah bad ki Executive Commmittee da u Chief Secretary-kaba pyndon bynta lang ia baroh ki Tnad ba don bynta.
“Haba ngi shna ia kano kano ka prokram kam pynroi, baroh kine ki bynta ki dei ban hap pyrkhat khnang ban pynthikna ba kino kino ki jingtei ki dei kiba la tei ba kin lah kyrda” ula ong.
U Conrad ula ong ba ki kyndon tei jingtei na ka bynta ki Jylla lum kum ka Meghalaya ka dei ban hap pynrung ia ka kyndon ba lah ban ialeh pyrshah ia ki jingpynjulor ka mariang bad ia ki DPR dei ban da leh audit bha shuwa ban ai jingmynjur.
“Peit ia kaei kaba jia ha Nongbah ka Ri bad ha kiwei ki ki nongbah jong kiba bun ki Jylla. Ngi la shem kumba ki pyrshang ban iapein bad ki jingeh la kumba ngim pat ju pynkhreh” ula ong.
Haba kdew ia ka jingnang kiew ki jingpyntrei ia ki jingtei kiba heh haba lehklet ia ki lynti iaid ka um, ula kdew ia ka jingshlei um ha Gurugram bad Guwahati.
“Phim lah ban ialeh pyrshah ia ka mariang, Ha Guwahati, ka wah Brahmaputra kaba khlain kala tuid sha ki bynta ba shatei bad ki lum ha ki bynta ba shathie. Ka um kan iaid na ki jaka them. Ki lynti iaid ka um bala pynwandur da ka mariang-la ki dei ki wahduid, ki nala ne ki wah-ki dei ka hok jong ka um ban iaid ha ka por ba jur slap” ula ong.
Kum ka Jylla ba ioh slap bun eh, ka Meghalaya kala mad ia ka jinglong ka suinbneng ka bym ithuh ithaw bad ki jingther kynsan u slap namar ka jingkylla ka suinbneng, kumba jia ha ri-lum Garo ha u 2014 bad dang shen ha Uttarakhad bad Nepal, ula ong.
