Guwahati, Nailar 27: Namar ka jingiai kiew dor ki marbam bad kiwei ki mar ba donkam, ka All Assam Students’ Union (AASU) ka la pynlong ia ki jingiakhih ha baroh kawei ka jylla ha kaba ka la kyntu ia ka Sorkar ba kan shim iaka sienjam ban pynduna iaka dor jong ki mar matta naka bynta ka jingmyntoi ki paidbah.
Ha Guwahati, ka All Guwahati (Kamrup) Mahanagar district Students’ Union ka la pynlong ka jingïaid paidbah na ka Ophis treikam kaba don ha Swahid Nyas ha Uzan Bazar ban leit sha Lamb Road bad Jorpukhuri, da kaba rah ïa ki placard bad ki pyrta iaki kyntien pyrshah ïa ka Sorkar halor ka jingkiew dor jong ki marbam bad ki mar ba pyndonkam man ka sngi.
U President ka AASU, u Utpal Sharma, u la iathuh ba iaki jingiakhih la pynlong ha ki jaka ba don ka Ophis treikam jong ka seng haki district ha kylleng ka Jylla Assam.
Katkum ka jingong jong ka AASU, ka jingkiew dor jong ki marbam, ki mar mata tiar ka la nang pynjynjar shuh shuh ïa ki longïing ha ki District ba shah ktah ha ka jingshlei um, katba ki kmie ki kpa ruh ki hap ban siew ïa ka bai skul, bai kolej.
“Ka la don ka jingkiew dor kynsan jong ki marbam bad kiwei kiwei ki marbam ba donkam, kumba katto katne ki District jong ka Assam ki ba shah ktah haka jingshlei ki skul bad ki kolej ki la sdang shim biang ïa ka bai rung skul na ka bynta ki khynnah.
Ka AASU ka la kyntu ia ka Sorkar ba ka dei ban shimkhia mardor ban pynbeit ia ka dor bad ban ai jingiarap ia ki nongthied nongpet.
