Shillong, Naialr 27: Ki Bar Associations ha kylleng ka Meghalaya ha ka sngi Palei, kila pynlong ia ka Rally ban dawa phah iehnohkam ne ban weng noh ia u Amit Kumar kum u Advocate General ka jylla, da kaba kynnoh ba ka rukom leh bad rukom pynsngew ka jong u ha ka por tian bishar ka long kumba khein poh ia ki nongiasaid ain.
U Senior Advocate u Kishore Chand Gautam ula ong, ba kane ka jingiakhih kam dei tang jong ka Shillong Bar Association bad ka High Court of Meghalaya Bar Association hynrei kala ioh ia ka jingkyrshan na ki kynhun jong ki nongiasaid ain kiba don ha kylleng jong ka jylla.
“Kane kam dei tang ka Shillong Bar Association ne ka High Court Bar Association. Kane ka kynthup ruh ia ki Bar Association na kylleng ki bynta jong ka Meghalaya,” ong u Gautam.
Kane ka jingiakhih kala mih hadien ba kala don ka jingkynnoh ba u Advocate General ula kren hapoh ka jingtian bishar ha kaba iadei bad ka jingshngain jong ki kynthei ha ki Bar. U Gautam ula ong, ba ka general body meeting jongka Bar Associations da kawei ka sur kala rai ban phah da ka jingthoh sha u Myntri Rangbah ka Jylla u Conrad K. Sangma ban kyrpad ban weng kam noh ia u Kumar.
U Gautam ula ong, hadien ba u Kumar ula pynpaw ia ka jingbabe halor ka rukom pynsngew ka jongu kaba la mih ha ka kaiphod. Hynrei ula pynapw pat ba katei ka jingpynsngew ka jongu kam donkam pat ban pan map.
Ka Bar Associations kala pyrshah ruh ia ka jingthoh kaba la pynmih ha ‘Shillong Times’, kaba u Gautam ula kynnoh ba kala pynmih ia ka jingsngewthuh bakla ba ki nongiasaid ain kila pyrshah ia u Kumar namar ba ula kyrshan ia ka kynthei kaba leh Intern.
“Katei ka rukom pynwandur kaba la thaw ka long kaba bakla shibun” ong u Gautam bad ka bynrap ba ka kyrdan ki nongiasaid ain ym shim la kdew eiei watla ki lah dep ban ai jingkren sha ki lad pathai khubor, kham hashwa.
Ki nongiasaid ain kila rai ruh ban Boycott ia katei ka kot khubor namar kam shim la pyni eiei ia ki bynta kiba iadei bad ka ain. U Gautam ula ong ba ka Association kan sa wad ruh ia ki lad ki lynti katkum ki ain ki kanun ha kaba iadei bad ka rukom pynmih ia katei ka khubor.
Ula kynnoh shuh shuh ba ka ophis jong u Advocate General’s kala pyndonkam da ki nongiasaid ain kiba nabar ka jylla wat na ka bynta ki mukotduma kiba rit eh. Ula buh jingkylli ruh ia ka rukom thung ia u khun jong u Kumar ban mihkhmat ia ka jylla hapoh ka Supreme Court.
U Gautam ula ong, ba ki nongiasaid ain kin sa wad jingtip lyngba ka Right to Information ban pan jingtip kiba bniah ia ka jingpynlut pynsep kiba donbynta da u Advocate General bad ka kynhun ka jongu.
Une u nongiasaid ain ba la rangbah ula kynthoh ruh ia u Myntri Rangbah ka jylla halor ka jingpynsngew ka jongu kaba dang shen ba ka Meghalaya ka long kaba donbok bha ban don ia u Amit Kumar kum u Advocate General.
“Kane kadei kaei kaei kaba la pynsngewsih jur ia man la ki nongiasaid ain. Dei na kane ka daw phi iohi ia ka jingbun jong kiba wan iashimbynta ha kane ka Rally” ong u Gautam.
Ka general body meeting jongka Bar Associations ha ka 24 tarik u Nailar kala pynkup bor ia ka Executive Committee jongka High Court of Meghalaya Bar Association bad ka Shillong Bar Association ban shim ia ka rai na ka bynta ban pynlong ia ki jingiakhih kiba nangne shakhmat.
U Gautam ula ong, ba ki nongiasaid ain kin bteng ban pynlong ia ki jingiakhih tad haduh ba ia u Kumar la phah hiar shuki noh na ka kam ne la wengkam noh ia u.
“Ngi lah ban lum sa ia kawei ka jingialang lashai ka sngi ne lashi sngi. Ngi ngin bteng bad ka jingiakhih ka jong ngi tad haduh ba la wengkam ne phah hiar shuki noh ia u Amit Kumar” ula ong.
