Shillong, Nailar 27 : U Myntri Rangbah Conrad K Sangma ha ka sngi Palei, ula pynlait ia ka installment ba nyngkong jong ka Umbrella Post-Matric Scholarship ba T.93.70 klur na ka bynta ki samla pule Scheduled Tribe jong u snem pule 2025-26.
Na ka bynta une u snem pule, 96812 tylli ki aplikeshon na ki samla pule ST na kylleng ka Meghalaya lah dep ban pynshisha, da ka jingmang pynlut baroh lang ba kot T.198.42 klur. Ka Ministry of Tribal Affairs, ka Sorkar India kala phah ktien ba ka bhah ka Sorkar Pdeng ka long T.84.55 klur, bad ka Sorkar Jylla kala pynlait 10% ka bhah jong ka T.9.40 klur ban pynthikna ba kan nym don ka jingpynslem.
Baroh lang, T.93.698 klur la pynlait kum ka installment ba nyngkong sha ki 96,812 ngut ki nongioh bynta na baroh ki District, lyngba ka Direct Benefit Transfer beit beit sha ki bank account jong ki samla pule.
Haba kren ha ka jingialang bala pynlong ha Shillong College, u Myntri Rangbah ula ong ba kane ka jingpynlait ka long kham palat ia ka pisa. “Ka dei ka bai skulk a ban sa siew noh ha ka pork aba biang, ka dei ka bai hostel ka ban nym tynrong ia ka jingkit ha ki longiing longsem, ka dei ka kot bad tiar pule kaba ki samla pule kim donkam shuh ban khuslai ba kin ioh, bad ka dei ka burom ba jar jar jong ki samla shynrang bad kynthei kiba lah haba khatduh ba kin pynleit jingmut haki jingpule”.
U Myntri Rangbah ula batai ia ka jingslem bad ka rukom pyniaid thymmai ia ka pisa sha ki samla pule ryngkat ka jinglong ba shai. Ula ong ba ha ki snem bala leit, ka jingpynlait pisa na ka Sorkar India ka ju slem bha. Ha u snem bala lah, ka Sorkar Jylla kala pynlait lupa ia ka pisa hashuwa ka Khristmas nala ka jong ka pla tyngka bad hadien kala pynbeit ia ka na ka pisa ba phah ka Sorkar pdeng.
Mynta u snem, ka Finance Ministry, ka Sorkar India kala pyntreikam ia ka Single Nodal Agency (SNA) ba thymmai ban pynlait ia ka pisa ha ka por kaba biang. Hapoh ka SNA, kam pisa kam wan shuh sha ka Ministry lane sha ka Sorkar Jylla. Hadien ba pyndep ia ki kot ki sla bad pynshisha da ka Jylla, ka Reserve Bank of India (RBI) kala phah beit beit ia ka pisa sha ka account jong ki samla pule.
“Mynshuwa, ka Ministry ka ju siew pat hadien ia ngi. Mynta lada nga ai advance sha phi, ka RBI kan phah beit beit ia ka pisa sha phi, phin ioh arshah. Kumta ka jingai advance jong nga kala kut noh, hynrei ka lynti thymmai kala plie ban ai beit beit ia ka pisa sha phi” ong u Myntri Rangbah.
“Ngi la pyndonkam ia ka jingpynbor sain pyrthei bad pynthikna ba ia ka installment ba nyngkong ba 40% la pynlait noh mardor. Kane ka dei kaba ngi pynlait mynta ka sngi”.
Ka RBI kala kular ban pyndep ia ka kam haduh 5 sngi kaba bun eh. U Myntri Rangbah ula kyntu ia ki samla ba kim dei ban khuslai lada ka SMS kam pat wan mynta ka sngi, haba pynpaw ba ki kam ki dang shu sdang mynta ka sngi da ka jingnion ia u budam, watla ka jingdon ka shuti jong ka Raksha Bandhan, la sngi Saitjain bad Sngi U Blei.
U Myntri Rangbah ula ai ia ka khubor sha ki 18 lak ki samla ba hapoh 20 snem hapoh ka Jylla. Ula ong ba nalor ki kyrdan pule bad ki sap treikam, kaba donkam eh ha ki briew ka dei ka jinglah ban shim ia ka jingkitkhlieh bad ban pyndep ia ki kam.
U Myntri Rangbah ula pyntip ba ka National Scholarship Portal jong u snem 2026-27 kala plie ha ka 3 tarik Naitung, 2026 bad kan iai plie haduh ka 30 tarik Naiwieng 2026, n aka bynta ki Pre bad Post-Matric Scholarship jong ki samla pule ST. La bthah ia ki Ophisar ba kin sdang noh ban pynshisha bad ban mang pisa noh kham kloi khnang ban kiar ia ka jingpynslem,
Ula ai ruh ka jingkular ba ka Sorkar kan sa buddien ia ka jingpynlait noh ia ka bhah ba sah jong ka Sorkar Pdeng bad ka CM Scholarship kham kloi kat kaba lah.
