Shillong, Nailar 27 : U Myntri Rangbah Conrad K Sangma ha ka sngi Balang ula ong ba ka Kynhun Myntri kala wanrah shuh shuh ia ki jingshai halor ka jingpyntreikam bad ki jingpynshitom hapoh ka Meghalaya Identification, Safety & Security of Migrant Workers Rules.
U Conrad u pyntip ba ia ki jingpynsngew jong u Lat ka Jylla ruh lah pynrung lang ha kane ka Rules.
“Ka kyndon thymmai kaba u Lat ula ai ki jingmut, kito ki jingpynkylla lah kynthup lang mynta. Ki don katto katne ki bynta ba iadei bad ka jingshai haba phai sha ka jingbatai ia ki Ophisar bad ki rukom treikam. Ngi la ngam jylliew bha ia ki bynta ba iadei bad ki Nongtrei kiba lah ban leit jurip, kumno ban pynlong ia ka jingjurip, ka bor ba ki don, kaei ka jingpynshitom ba ki lah ban leh”.
U ong ba kane ka Rules bala pynkylla thymmai, kala ai jingshai ruh halor ka kuna, ka jingset phatok bad ka jingbishar ain.
“Yn sa ai ia ki jinghikai kiba donkam sha ki nongtrei ba dei khmih ki ban pyntreikam ia ka rule” bynrap u Conrad.
Ka kynhun Myntri kala ai jingmynjur ruh ia ka rule jong ka Meghalaya Flood Plain Zoning Act, 2026 ban lah pyntreikam noh ia kane ka ain.
