Shillong,Nailar 25 : Ka Sorkar Jylla kala pynthymmai ia ka jingpynlut ha ka New Shilong Water Supply Scheme (NSWSS) Phase-I sha ka T.772.92 klur, kaba kiew da T.234.48 klur na kaei kaba la mang nyngkong ba long T.538.44 klur.
U Myntri ka PHE Marcuise N Marak ula pyntip ia kane hapoh ka Iingdorbar Thaw Ain ha ka sngi Ba-ar haba jubab ia ka call attention notice bala wanrah da u MLA ka Mawryngkneng Bah Heaving Stone Kharpran.
U Marak ula ong ba ka skhim ka thmu ban ai ia ka umbam umdih kaba khuid sha ka New Shillong Township, ka Mawkhanu Knowledge City bad 32 tylli ki shnong ba marjan kynthup ka Mawdiangdiang, Mawpdang, Diengpasoh, Nonghali, Umsawli bad kiwei nalor ki Institution bad ki Ophis ba don ha New Shillong.
Ula pyntip ba ka Phase-I ka kynthup ia ka jingshna ia ka dam bad ka jackwell ha Nonghali (Wah Umkhen), jingbuh ia ka MS Pumping main, Stage-I Pumping Station ha Diengpasoh, pump/motor water treatment plant ha Mawpdang, ki surok pyniasoh, ka SCADA system bad ka jingthied jaka.
Haba batai ia ka jingkiew ka jingpynlut, u Marak ula ong ba san tylli ki daw ki dei kiba la pynlong ia kane ka jingpynthymmai, ia kaba ym lah satia ban kiar ne leh eiei.
Ka daw ba hakhmat eh, u ong, ka dei ka jingpynkynriah ia ka jaka shna dam kaba long shaneng jong ka wah hadien ba shem ba ka don ka jingtyrwa ban buh jaka theh niut marjan bad ka jaka shna dam ba nyngkong ha Nonghali.
Ban kiar ia ki jingma na ki jingjot ka mariang bad ka koit ka khiah u paidbah, ia ka dam la hap ban pynwandur thymmai daka jingnang pynheh ia ka jingiar, ka rukom shna, ka jingpynkylla ha ki bynta ba tuid ka um ba shlei, ka jingpynwandur thymmai ia ki radial gate bad spillway, kaba la nang pynbun ia ka jinglut ha ka kam civil bad mechanical.
Ka jingpynkynriah ka donkam ruh ia ka jinghap pynmadan ia ka lum bad pynskhem bha ia ka sharing hajan jong ka jackwell, ka bym shym la don satia ha ka jingmang pisa ba nyngkong.
Kiwei pat ki daw ki kynthup ia ka jingsiew bai lutksan ba dawa da ka Dorbar Shnong ka Nonghali, Diengpasoh bad Mawpdiang haba iadeibad ka jingsiang pipe na ki jakaka shnong, ka jingpyntrei ia ki pumping station ki bym don satia ha ka DPR, ka jingpynpra bad tei pat ia ka surok PWD ba 1.5 Km ha Jaroit bad Diengpasoh namar ka jingpynkylla ia ka lynti iaid, ula bynrap.
Ia kane ka jingmang pynlut ba nyngkong la ai jingmynjur ha ka 15 tarik Lber, 2024 bad ia ka jingmang pynlut ba thymmai la ai jingmynjur ha ka 26 tarik Jymmang 2026.
 Phase-I sha ka T.772.92 klur, kaba kiew da T.234.48 klur na kaei kaba la mang nyngkong ba long T.538.44 klur.){kind=link}