Shillong, Nailar 25 : Ka Sorkar kala wan kit biang ia ki lai ngut ki nongialam ba hakhmat ka Khasi Students’ Union ba shah kem sha Shillong bad la rah ia ki sha Shillong District Jail hadien ba ki wan poi na Tura bad Williamnagar.
Kine ki lai ngut ki dei u President samla Raymond Kharjana, Vice President Pynkmenlang Sanmiet bad u General Seretary samla Reuben Najiar.
Haba ioh jingtip ia kane, ki nongialam ka KSU ba kynthup ia u Assistant General Secretary samla Pynshaiborlang Rani bad kumjuh ruh u President bad General Secretary barim ka KSU, kila leit iakynduh ia kine ki lai ngut ki ha phatok, ban kylli pyrthew khamtam eh halor ka koit ka khiah jong ki.
U General Secretary barim ka KSU samla Donald Thabah ula pyntip ba kine ki laingut ki nongialam ki don hapdeng ka met ka phad kaba shait ba khlain.
Haba kylli, u samla Donald u pyntip ba ka KSU kala thung ia ka Central Executive Committee ba thymmai bad kane ka CEC kan sa shong jingialang mynta ka janmiet ban shim rai halor ka jingkhot iakren jong u Myntri Rangbah ka Jylla halor ki 5 tylli ki mat jingdawa ka Seng.
