Shillong, Nailar 25 : U Myntri ka tnad PHE Marcuise N Marak ha ka sngi Ba-ar ula ong ba ka Sorkar Pdeng kala ai T.336.62 klur sha ka Meghalaya hapoh ka JJM 2.0 na ka bynta u snem 2026-27, hynrei ula ong ba ka dang dei tang ka jingmang ym bala pynlait, naba ia ka jingpynlait pisa la pyniasnoh bad ka jingpyntreikam pyrrkhing ia ki kyndon bad jingpyndep ia ki skhim.
Haba kdew ia ka shithi mang tyngka bala ai da ka National Jal jeevan Mission hapoh ka Ministry of Jal Shakti, u Marak ula iathuh ia ka Iingdorbar ba ka jingai pisa ka long T.2.36 klur kum ka bhah ka Sorkar Pdeng na ka bhah ka Jylla na ka bynta ki SVS, T.171.46 klur kum ka jingpynlait lypa shuwa ban pyntrei ia ka kam na ka bynta ka SVS, MVS bad ki Pipe Water Supply Scheme, T.140.78 klur hapoh ka reimbursement mode ka MVS, T.15.73 klur ban kyrshan ia kiwei ki kam bad T.6.29 klur ban khmih bniah ia ka jingkhuid ka um.
Haba pynpaw ba ka Meghalaya kala leh bha ban ia kiwei, ula ong “Kane ka dei ka jingai pisa na ka bynta ka JJM 2.0 u snem 2026-27. Haba pyrkhat ia ka T.336.62 klur bala ai bad mang na ka bynta ka Meghalaya, kane ka jingai pisa ka kham bun bunshah ban ia kiwei ki Jylla Shatei Lam Mihngi lane ki Jylla lum”.
Ha kajuh ka por, ula maham “dei pat ban sngewthuh ba kane ka dei ka jingmang bad jingai pisa jong ka JJM, ym ka jingpynlait”.
U Marak ula batai ba ka Ministry kan pynlait ia ka pisa tang hadien bala pyndep ia baroh ki kyndon bala buh kynthup ka financial audit jong ki arsnem bala leit, thaw ia ka head of account da u Accountant General bad kiwei kiwei.
U Myntri u ong ba ka jingpynlait pisa kan long hakhmat eh ia ki skhim kiba la dep ban pyntrei pura.
“Ka jingpynlait pisa kan long shuwa ia ki skhim bala pyndep 100%, hadien 95-100%, bud sa ka 90-95% bad ter ter. Kumta la kyrpad ia ki contractor ba kin shim ia ki sienjam ha kaban pyndep ia ki skhim” ong u Marak.
Kane ka jingkren kala mih ruh haba jubab ia ka jingsngewkhia bala pynpaw da u MLA ka UDP na Nongpoh Bah Mayralborn Syiem uba la pynsngew ia ka jingduna pisa la arsnem hapoh ka JJM bad ka jingnang kynton ki bill ba khlem pat siew.
