Pynksan u Myntri ia ka jingkhot tender EPC ba T.850.59 klur ia ka New Shillong Water Supply Scheme

Shillong, Nailar 25: Ka Sorkar Jylla kala pynksan iaka jingkhot Tender kaba T. 850.589 klur jong ka New Shillong Water Supply Scheme Phase-II (Part A) ha ka EPC mode, da kaba pynpaw ba kan pynthikna ia ka jingkitkhlieh bad ia ka jingpyndep ha ka por kaba la buh.

Kane ka jingkren u Myntri ka tnad PHE u Marcuise N Marak kadei haba jubab ia ka Zero Hour Notice kaba la wanrah da u MLA ka Nongkrem u Bah Ardent Miller Basaiawmoit ha ka sngi Baar jong ka Dorbar Synrai.

Haba pyntip hapoh ka iingdorbar u Marak ula ong, “Ka jingtei ia ka New Shillong Water Supply Scheme, Phase-II (Part A) kadei kaba la bhah ha ka 30 tarik u Naitung 2026 ha ka jinglut jingsep kaba kot T.850.589 Klur bad la khot ia ka Tender lyngba ka EPC mode ha ka 31 tarik u Naitung 2026.”

Ula ong ba kane ka projek ka kynthup ia ka jingsorjamin ia ki jaka, jingtohkit, jingpynwandur bad ka jingpyniaid ia ka pump um kaba kongsan sha ka Water Treatment Plant na Mawpdang sha MCWR-1 ha Mawlynrei bad MCWR-2 ha Umsawli, ka jingtei ia ka Main bad Zonal Clear Water Reservoirs, Feeder and Distribution Mains, Pump Sets bad ka RCC Pump House, DG Sets, ki sainar bording elektrik bad ka Sub-Station, ryngkat bad ka surok, IoT bad SCADA Systems, Laboratories, Hydrants bad jingpyndonkam biang ia ki jingdon jingem kiba la don lypa.

U Marak ula ong, ba katei ka Mode kadei kaba biang tam na ka bynta ka Urban Water Supply Schemes kaba heh bad kaba kynthup ia ki bynta kum ka Intake, WTP, Pumping Stations, Transmission and Distribution Networks bad ki bynta kiba iadei bad ka bording elektrik.

Ula ong, “Hapoh jongka EPC, u nongtrei un khmih bad iatrei hapoh jong uwei u kontraktor uban shim ia ka jingkitkhlieh ban iatreilang halor ka jingpynwandur ia ka design, ka jingthied ia ki mar ki mata, jingtei, jingkhmih bniah, jingpyntreikam bad ka jingpyni ia ka rukom pyntreikam. Kane kan pynduna ia ka jingthud bad ia ki kynrum kynram ha kaba iadei bad ka jingkitkhlieh bad ban pynkloi ha kaban pynbeit ia kino kino ki jingeh kiba mih”.

Kat kum ka jingong u Myntri, ka EPC kan pynthikna ia ka rukom pynlut kaba bun, jingpyntreikam kloi lyngba ki jingpyntreikam kiba bun kiba iaid ryngkat, ka jingpynkynriah ia ki projek kiba don jingma sha u kontraktor bad ka jingtrei kaba don ia ka jingkitkhlieh”.

Ki jingma kiba iadonbynta bad ka Detailed Engineering, jingthied ia ki tiar, ka rukom shna, ka jingpyniasoh ia ki tiar ki tar bad ka jingseisoh jong ki katto katne ki bynta kidei kiei kiei kiba lah ban aiti ha ki EPC contractor. Lada ia ka kam la phiah ha kiba bun tylli ki kyrdan ne Package. Ka Tnad kan mad ia ka jingeh kaba khraw ha kaba iadei bad ki jingtynjuh kiban mih na ka jingiatreilang” ula iasaid.

U Marak ula kdew shuh shuh ba kiba bun tylli ki kyrdan kan lam sha ka jingpynmih ia ki jingeh jong ka jingpan jingbit bunsien na ka PWD, MeECL, Urban Affairs bad Pulit ban tih ia ka surok, ban pynkynriah ia ki tiar ki tar bad ha kaba iadei bad ka jingkhmih ia ka jingshngain.

“Ka rukom leh da ka EPC kan pynduna ia kine ki jingeh da kaba pynkhamti ia kiba bun ki jingkitkhlieh ha uwei u Kontraktor. Kane kan kiar na kino kino ki kynrum kynram, ka jingtrei bunsien bad ka jingpynslem kaba lah ban mih, lada don bun ngut than ki kontraktor ha ki tnad bapher bapher” ula ong.

Ula banjur ba ia kino kino ki jingduna ne jingdkoh bad ia ka O&M kaba 3 snem kan shah pyntlot noh lada ki don bun ngut than ki kontraktor, kan pynlong ban buh jingeh ban pynkhamti ia ka jingkitkhlieh haba don kano kano ka jingpulom ne ka jingthud ha kaban pynpoi ia ka umbam umdih kaba 24×7 katkum ki kyndon jongka CPHEEO.

U Marak ula pynapw ba ka Bidding lyngba ka EPC ka long kaba don nongrim bad kan “pynbiang ia ka rukom treikam kaba janai, pynduna ia ka jingiatreilang bad kiwei pat bad ia ki jingma, pynbha ia ka jinglut jingsep bad ia ka por, ka jingpyniaid bad jingkyrshan kaba biang por ia ka rukom treikam kaba pura, shaniah bad kaba treikam jong ka jingsam ia ka umbam umdih ha New Shillong.”