Shillong, Nailar 26 : U Myntri Rangbah ka Jylla Conrad K Sangma ha ka sngi Ba-ar ula pyntip ba lah dep ban weng ia ka jingkhang tih dewiong ha Jylla bad ka Iingkashari Supreme Court kala ai jingbit ban tih par kat kum ka ain, bad ong ruh ba u Myntri ka Coal Ministry ula bthah ia ki Ophisar ban wad ia ka lynti treikam kiba la don lypa kiba lah ban leh na ka bynta ka Meghalaya.
Haba jubab ia ka jingiatai nia kaba lyngkot bala wanrah da u President ka VPP Ardent Miller Basaiawmoit, u Conrad ula ong “Nga kmen ban pyntip sha phi ba ia ka jingkhang tih dewiong lah dep ban weng noh. Lada don ki bym pat tip, ia ka jingkhang tih par lah dep ban weng. Kaei kaba ka Supreme Court ka ong ka long ba phi hap ban tih kar kum ka ain”.
Ula ong ba ka jingpynkynriah sha ka jingtih par kat kum ka jingstad saian ka long kaba jyrwit jyrwat bha ha Meghalaya namar ka rukom long ka riti bat khyndew bad ka jingstang ki syrtap dewiong kaba buh ia ka rukom tih open-cast ban nym iahap satia.
“Ka Coal Ministry kala khmih ia ka Meghalaya ha kawei pat ka rukom bad ka hap ban thaw ia ka ain ban pynbiang tarajur ia ka jingshngain bad ka ioh ka kot” ula ong.
Ha ka jingiakynduh ba dang shen ha Delhi, u Conrad ula ong “Nga la iakynduh ia ka Coal Minister lem bad ka MLA na Sutnga-Saipung. U Myntri ha ka jingialang ula kren shai. Ula pynpaw ba un sa wad ia ka lynti. Ula pyntip ia ki Ophisar ba ki par bad ki trai khyndew ha Meghalaya ka iapher bad kumta ka jingtyrwa kam lah ban dei da kajuh. Nga la kyrpad ia ka lynti ban pynbeit da ka por bad u Myntri ula ai ka jingbthah”.
U ong ba ka Jylla ka kyrmen ba ka jingbuh kyndon ba 100-hectare ba duna eh ka jaka yn sa pynduna bun shah sha u pud ba lah ban pyntrei na ka bynta ki nongtih par trai jylla, ryngkat ki buit treikam bad ki lad jingiada ban iada ia ki nongtih par bad ia ka mariang.
U Conrad ula ong ba ula batai bniah ruh ia u Additional Secretary ka Coal Ministry ba balei ka Meghalaya ka donkam ia ka jingiarap ba kyrpang.
U CM ula ong ba ka Sorkar ka mynjur bad u nongwanrah ia ka mat iatai bad sngewthuh ia ka jingeh jong ki nongtih par tynrai kiba duna ka jingnang jingtip bad shem jingeh ban pyntreikam ia ki technology ba thymmai hadien ba ka NGT kala khang kynsan ia ka jingtih dewiong.
Haba kdew ia ki jingeh ban pyntreikam, ula ong ba tang ha East Jaintia Hills ki don haduh 22,000 tylli ki par dewiong.
“Kat kane ka jingbun ki par, phim lah ban pyrkhat. Ka dei ka jingiaksaid ia ki Ophisar ban pynthikna ba ki kam ki iaid kat kum ka ain” ula ong.
Ula iathuh ba ka jingtih par beain kala lam sha ka jingkhang ia ki par bad ktah ia ka kamai jakpoh, hynrei ka Sorkar ka dang trei ia ki kam ban pynthikna ba ka jingtih par kat kum ka ain kan iai bteng bad ba ki kam beain kin sangeh noh.
