Shillong, Nailur 16 : Ka Mawlai SC ka la ieng iakhun tyngeh tad haduh ba kan da lah ban pyniakhaid da 0-0 pyrshah ia ka Langsning FC ha ka lympung Shillong Premier League 2026, ba long hynne ka janmiet ha SSA Stadium.
Da kane ka nam iakhaid, ka Mawlai SC joit kan kiew biang sha ka kyrdan ba halor ka miej iakhein point, hadien ba ka la ioh ba kan khur 11 point na ki san tylli ki jingialehkai ba ka la dep, kampher wat hadien ba kan ia ryngkat bad ka Shillong Lajong FC, hynrei ka jingiapher hapdeng kine ar ka long ha ka jingiathep kol goal difference (+7 to +1).
Katba na ka liang ka kynhun ialehkai ka Langsning FC kane ka nam iakhaid ka pynlong iaka ba kan iai neh ha ka kyrdan kaba lai hadien ba ka la khur 10 point.
Ki minit jong ka jingiakhun hi ka long ba ka Langsning FC ka la jan ioh ia ka kabu ba kan tam shakhmat jan arsien hapoh ki san minit ba la sdang ka jingiakhun lyngba u Syed Ahmed uba la ioh ban head ia ka bol na ka corner ba la shut da u Allen Lyngdoh Nongbri hynrei ka bol ka la dei ia ka dieng kol, bad sa shisien u Ahmed u la khyrwit jam ia ka bol ia kaba la lah ban kyrda noh ia ka da uwei u rang ba ialehkai dien ka Mawlai.
Haba wan ban bteng ia ka kylla miet, ynda haba ka jingiakhun ka la kham jam shakhmat, u Samuel Phawa u la pyrshang borbah ban khyrwit jam bha ia ka bol kaba la dei biang dain ia ka dieng kol, bad kane ka bol ka wanphai biang shapdeng ka madan iakhun kaba hangne u Kynsai Ryngkhlem uba don ha ka jaka ba paka bha u la kynthih ban ioh head ia ka bol kaba suit kan her beit shalor ka diengkol
Lashai ka sngi, ka jingiakhun kan long hapdeng ka Nangkiew Irat pyrshah ia ka Rangdajied United kaban long ha ka por 3 baje nohphai sngi.
