Shillong, Nailur 17: U MLA ka UDP na Mawphlang Constituency Bah Beyondstar Mathew Kurbah, ha ka sngi Balang, ula kren da kaba shai kdar halor ka jingthmu pyniasoh sha ka Bharatiya Janata Party (BJP) bad ong ba kampher lada u rem ha ka elekshon MLA 2028 tangba ka jaidbynriew kan im.
Une u MLA ka Mawphlang u dei uba ar na ki 8 ngut ki MLA ba thmu pyniasoh sha ka BJP, uba la pynbna paidbah nalor u MLA ka Khliehriat Bah Kyrmen Shylla.
U Bah Beyond ula pynbna ia kane ka rai ha ka jingialang paidbah kaba ula pynlong hynnin ka sngi ha Mawngap, kaba la wan iashimbynta da ki nongkyrshan, ki nongialam shnong, ki longkmie bad samla na kylleng ki shnong ka Mawphlang Constituency.
Phra ngut ki MLA ki don jingthmu ban leit iasoh noh shen sha ka BJP hadien ka jingkular jong ki nongialam ka BJP na Delhi ba kin pyntreikam ia ki mat jingdawa ki MLA ba kynthup ia ka jingpynbeit ia ka FCRA ba kan ym ktah ia ki Khristan, ka jingpyntreikam ia ka MRSSA, jingpynrung ia ka ktien Khasi ha ka Khyrnit ba Phra ka Riti Synshar ka Ri, ka kam tih dewiong, pynkynriah ia ka Them Metor bad kiwei kiwei.
Haba kren ha ka jingialang, u Bah Beyond ula ong “Lada ka BJP ka kular bad ka pyntreikam ia ki mat jingdawa, khlem artatien ki MLA ka UDP kin leit ban pyniasoh noh bad ka BJP” haba bynrap ba lada ki MLA ka UDP ki leit pyniasoh sha ka BJP, kane kan ym dei atia na ka bynta ka daw shimet hynrei kadei na ka bynta ka bha ka miat, ka roi ka par jong ki paitbah bad ka Jaidbynriew.
“Ka sienjam jong ngi ka long eh na ka bynta ka Jaidbynrriew…kam pher wat lada ngi rem ha ka elekshon ban wan tangba ka Jaidbynriew kan im bad kan iai kynmaw ia kaei kaba ngi leh” ula ong haba iakren bad ka Shlem hadien ba wai ka jingialang ha Mawngap.
Kat kum ka jingong jong u, ka jingiakren bad ki nongialam ka BJP kala iaid la bunsien bad kine ki nongialam kila kular ban pyntreikam kawei hadien kawei ia ki mat jingdawa jong ki 8 ngut ki MLA ka UDP hashuwa ka elekshon MLA 2028.
“Ngi kyrmen ba ka BJP kan pyntreikam ia kine ki jingdawa bad khlem pep, ki MLA ka UDP kin sa leit iasoh” ula bynrap.
Haba kylli, u Bah Beyond ula ong ba ki paidbah nongkyrshan kila ai ka jingkyrshan ia kane ka jingthmu jong u.
“Ki paitbah baroh kila ieng bad kila thap kti ia kane ka jingthmu ka jong nga, kadei hi na ka bynta jongki bad kam dei na ka bynta ka jong nga shimet” ong u Bah Beyondstar haba bynrap “Ka daw kaba la pynbor ia u ban leit pyniasoh noh bad ka BJP ka dei namar ka roi ka par hapoh ka Constituency, bad naduh u snem 2023 bad mynta lah palat 3 snem kam don jingkyrmen ban ioh ia kata ka roi ka par. Ngi kyrmen bad khmih lynti ba lyngba ka jingrung sha ka BJP kan ai ia ka roi ka par na ka bynta ka Mawphlang Constituency”.
Halor ki jingkynnoh ba ka BJP ka dei kaba leh bein ia ki Khristan, u Bah Beyondstar ula ong, “Kane baroh kadei ka kam pynthame ia u paitbah da mano re mano” .
“Ha Mawphlang Constituency ki don ki jait niam bapher bapher, ki Seng Khasi ruh ki don bad ki Niam Khristan ruh ki don. Ngi ia burom mar kylliang….da ka jingdon jong ngi hapoh ka BJP ngin long ka bor ban nym shah ia ka jinglehbein ia kino kino ki niam” ula ong.
