Shillong, Nailur 17 : Ki rang bad thei ialehkai ka Ri-Bhoi District Sports Association ki la rah ia ka nam lahduh ha ka lympung Meghalaya State Senior Athletics Championship 2026, kaba lai sngi ha Sports Authority of India, NEHU.
Ha kaba kut jong ki lai sngi kane ka lympung ba la lah ban pynkhie im biang haduh 18 snem, ka kynhun ialehkai ka Ri Bhoi ki la ioh ba kin khur haduh 9 tylli ki takma ksiar, 7 tylli ki takma rupa bad 7 tylli ki takma rnong.
Ka kynhun kaba wan ba bat ia ka kyrdan kaba ar dei ka West Jaintia, kaba la ioh ba kan khur 7 tylli ki takma ksiar, 6 tylli ki takma rupa bad 2 tylli ki takma rnong.
Ka kynhun ba wan ba lai dei ka East Khasi Hills kaba la ioh ban khur mar 5 tylli ki takma ksiar bad rupa bad 2 tylli ki takma rnong.
Ha kane ka lympung jan baroh ki 12 tylli ki district ki la lah ba kin leit phai sha la iing da ka jingioh ba kin khur kumba artylli ki takma.
Nalor kata, ha kine ki lai sngi jong kane ka jingiakob, la mih paw ruh ki rang bad thei ialehkai ba kynsai (best athlete), kaba ha kane ka kynti kaba mynta, ki nongialeh kai ba la ioh khur ia kane ka khusnam ki long u Eliam Bonkam G Sangma ka South West Garo Hills bad ka Phibakmen Rynghang ka Ri-Bhoi.
Nalor katta la sam ruh ia ka khsnam Promising Athletes, kaba leit sha u Lastly Suchiang ka East Jaintia Hills bad ka Monlangki Kyndait ka West Jaintia Hills.
Ka kongsan ba la don lang ha kane ka sngi dei ka Glynis Leanne Nunn, kaba dei teng ka nongialehkai ba la khur ia ka takma ksiar na ka heptathlon na bynta ka Australia ha ka Los Angeles Olympic ba la long ha u snem 1984, bad symbud kongsan dei u working president Meghalaya State Olympic Association u bah John F. Kharshiing, ia kaba la bynrap lang da ka jingdon lang bad sa kiwei pat ki dkhot ka MSOA bad kumjuh ka MAA, nalor ki khynnah ba ialehkai bad ia ki kyntien ai khublei la ioh na u Secretary ka MAA bah Finely L. Pariat.
