Shillong, Nailur 16 : U Myntri Rangbah Conrad K Sangma ha ka sngi Balang ula leit hiar kyrkieh sha ka Ophis ka Directorate of Mineral Resources (DMR) ha Risa Colony hadien ka jingshah kawang petrol bomb ha ki runar, kaba la wanrah ia ka jngjulor jong kawei ka kali ba pynieng ha phyllaw.
U Myntri Rangbah, ba la synran da u Chief Secretary bad ki heh Ophisar, ula peit thuh ia ka jinglong jingman bad kular ban ai bai lutksan ia ka kali ba shah pynjulor.
“U Myntri Rangbah ula peit thuh ia ka jinglong jingman. Ula ong ba naba ka kali ka dei jong u nongtrei bad ka dei ka kali shimet, ka Sorkar kan iarap bad ka bailut baisep. U CM ula ban jur ruh ia ka jingdonkam ban pyndait kham bun ki kor CCTV, ym tang hangne hynrei ia kiwei ki Ophis ruh khnang ba yn lah ban ioh ring dur ia kum kineki jingjia” ong u Director ka DMR Bah MB Tongper.
Kane ka jingwan kawang petrol bomb kala jia ha ka por 3:32 baje janmiet katba ki nongtrei ki dang ia bunkam ha Ophis. U petrol bomb ula dei ia ka kali Alto ML05-AC-0429 kaba dei jong u Ophisar ka DMR.
Haba iathuh ia kaei kaba jia, u Bah Tongper ula ong “Nga dang don ha kamra, Nga dang iashong jingialang bad nga la ioh sngew ia ka jingpait iit. Nga dang mut ba ka kali kala tynrah ia u paia, hynrei ynda ngi la iakhmih bha, ngi la iohi pynban ia ka ding. Ka kali kala kem ding na ki bynta ba shakhmat”.
“Donbok ba u nongtrei jong ngi u don shabar bad tang hapoh 4-5 minit, ngi la lah ban pynlip ia ka ding” ula ong.
Ki Pulit ka Laitumkhrah Police Station kila sdang ia ka jingtohkit hadien ba ujor ia 2 tylli ki ejahar-kawei da u Director ka DMR bad kawei da u Nongtrei uba dei u trai jong kane ka kali.
“Ngim tip satia mano ba leh ia kane. Kane ka dei ka sien nyngkong ba kum kane ka jingjia kala jia bad ngim tip satia ia ka daw. Ngi la dep pyntip lut sha ki Pulit bad ka jingtohkit kala iaid mynta” ong u Bah Tongper.
