Shillong, Nailur 16: U MP ka Rajya Sabha na Meghalaya u James Pangsang Kongkal Sangma ula shah jied ha u Lamphang jong ka Lok Sabha u Om Birla kum u nongshah khot sngewbha ban iadonlang ha ka Joint Parliamentary Committee ka ban khmih bniah halor ka Foreign Contribution (Regulation) Amendment Bill, 2026.
Ka ophis jong ka Lok Sabha Secretariat kala phah da ka jingthoh sha u James Sangma halor katei ka jingshah jied.
U Sangma, udei u Nongialam ka seng National People’s Party (NPP) uba mihkhmat ia ka Jylla Meghalaya ha ka Rajya Sabha. Ka samoi treikam jongu kala sdang ha ka 22 tarik u Jylliew 2026.
Ia ka Foreign Contribution (Regulation) Amendment Bill, 2026 la phah sha ka
Joint Parliamentary Committee kaba kynthup ia ki 21 ngut ki dkhot na ka Lok Sabha bad 10 ngut na ka Rajya Sabha ba kin khmih bniah bha.
U MP ka BJP u Dr Sanjay Jaiswal ula shah thung kum u Chairperson jongka Joint Committee naduh ka 2 tarik u Nailur.
La bthah ia ka Committee ba kan khmih bniah ia ki jingtyrwa jong katei ka ain kaba la thaw bad ban aiti ia ka kaiphod sha ka Lok Sabha ha ka Tarik kaba khatduh
jong ka taiew kaba nyngkong jong ka Dorbar Tlang jong ka Parliament, 2026.
Ka Committee kan shong ia ka jingialang kaba nyngkong ka jongka ha ka 18 tarik u Nailur ha ka por 2.30 mynsngi ha Committee Room No. 2, EPHA, New Delhi. Ki nongmihkhmat na ka Ministry of Home Affairs kin ai jingbatai kaba bniah ia ki dkhot halor ka Foreign Contribution (Regulation) Amendment Bill ha katei ka jingialang.
Ka Foreign Contribution Regulation ka khmih ia ki jingioh pdiang bad ka jingpyntreikam ia ki synniang kiba la ioh nabar ri da ki riewshimet kiba dei hok, ki seng bad ki kynhun ha ka ri India. Ka Ministry of Home Affairs kadei ka bor khmih ia ka FCRA.
Ka Parliamentary Committee kan bishar bniah ia kitei ki jingtyrwa hashwa ban aiti ia ka kaiphod sha ka iingdorbar. Ka jingkynthup lang ia u Sangma kum u nongshah khot sngewbha ka ailad ia u MP ka Meghalaya ban ioh iatai halor katei ka Bill.
