Shillong, Nailur 16 : U Myntri Rangbah ka Jylla Conrad K Sangma ha ka sngi Balang ula buh ia u mawnongrim ban shna pynbha ia ka Iew Malki ha Madan Malki, Shillong, bala mang T.24.27 klur haba pynbna ruh ia ka jingthmu jong ka Sorkar ban shna ia ka surok 4-lane na na Rilbong Museum sha Anjalee Point, Rhino Point bad Civil Hospital ban pynduna ia ka jingkhapngiah ka iaid ka ieng ki kali.
U Conrad ula ong ba ka jingkynshew ha ki jingtei jong ki Iew ka dei kaba thmu ban pynkhlain ia ki kam kamai kajih, pynioh ia ki jaka khaii kiba kham biang bad plie ia ka lad kamai jakpoh.
Ula ong ba ka jaka na ka bynta ka Iew Malki ka dei kawei na kiba heh tam napdeng ki project shna Iew hapoh ka Jylla, kaba pyni ia ka jinglah jong ka thain ban long kum ka jaka khaii kaba kongsan ka ban ai jingmyntoi ia ka Malki bad ki shnong ba marjan.
Kane ka project ka dei shibynta na ka jingshimkhia ka Sorkar ban pynheh ia ki Iew ha kylleng ka Shillong, da ki project ba shongdor T.130 klur bala shim lyngba ka mang tyngka ka Jylla. Nalor kane, ki project ba shongdor T.100 klur la pyntreikam ha kylleng ki jaka ka Shillong hapoh ka Smart City.
Ki project ba bei tyngka ka Jylla ki kynthup ia ka Laitumkhrah Shoping Complex ba T.38 klur, ka Iew Laban ba T.14 klur, ka Iew Lumshyiap ba T.2 klur, ka jingpynroi ha Polo ba T.30 klur, ka Iew ki nongshongdukan madan ha Dhankheti, Barik, Brightwell Bungalow, MUDA bad Polo ba T. 6 klur, Khasi Market ba T.1 klur, ka jingshna pynbha ia ka Iewduh ba T.14 klur bad ka Iew Malki ba T.24.27 klur.
U Conrad ula ong ba ka jingkynshew ha ki jingtei jong ki Iew ka dei kaba thmu ban pynkhlain ia ki kam kamai kajih, pynioh ia ki jaka khaii kiba kham biang bad plie ia ka lad kamai jakpoh.
Ula ong ba ka jaka na ka bynta ka Iew Malki ka dei kawei na kiba heh tam napdeng ki project shna Iew hapoh ka Jylla, kaba pyni ia ka jinglah jong ka thain ban long kum ka jaka khaii kaba kongsan ka ban ai jingmyntoi ia ka Malki bad ki shnong ba marjan.
U Myntri Rangbah ula kren ruh halor ki project jingtei kiba heh, kiba thmu na ka bynta ka thain. Ki kam kila sdang ban pynlong ia ka Barik Point kum ka Urban Hub ba kongsan, katba ka Sorkar ka dang pynkhreh ban shna ia ka surok 4-lane na Rilbong Museum sha Anjalee Point, Rhino Point bad Civil Hospital ban pynduna ia ka jingkhapngiah ka iaid ka ieng ki kali.
U iathuh ba kumba 75% na ki jingtei ia ka New Secretariat ha Umsawli kala dep bad ka Sorkar ka khmih lynti ban sa kynriah noh sha katei ka jaka ha u snem ban wan. Hadien kane ka jingpynkynriah, ia ka jaka ba don ka Secretariat ba mynta la tyrwa ban pynroi da ki surok ba kham heh, ka jaka iaid kjat paidbah bad ki jaka ba jyrngam da ki jingthung.
U Conrad u ong ba kine ki project ki lah ban wanrah ia ka jingkylla kaba khraw ia ka Malki bad ki shnong ba marjan ha kine ki arsnem haduh laisnem ban wan.
Haba kren halor ki sienjam bala shim da ka Sorkar ban wanrah ia ka roi ka par ha kine ki phra snem bala leit noh, u Myntri Rangbah ula ong ba ka jingkiew ka dei ban ai jingmyntoi beit beit ia ki briew shimet, ki longiing longsem bad ki shnong ki thaw.
Ula ban jur ba ka roi ka par ka dei ban kynthup lang ia baroh bad ban pyntrei ia ki ha ryngkat bad ki shnong ki thaw, ki bor treikam nala tynrai bad ki nongialam shnong. Ula ban jur ruh ia ka jingdonkam ban pynbiang tarajur hapdeng ka jingkiew ka ioh ka kot bad ka jingiada ia ka mariang, haba pynpaw ba ka sawdong sawkun ha ka mariang bad ka ioh ka kot ka dei ban iaid ryngkat ryngkat.
U Myntri Rangbah ula bthah ia ka Tnad Urban Affairs bad ia ki Contractor ba kin pynthikna ba kin trei bha ia ka kam bad ban pyndep hapoh ka por bala buh ia ka project ha Malki. Ula kyntu ia ki Rangbah Shnong bad ki nongialam ka thain ba kin peitthuh ia ka kam.
