Shillong, Naiwieng 19 : Ka Meghalaya kan kynriah noh mynta na ka jingshim ram ba tang katto katne snem sha ka jingshim ram ba bun snem hapoh ka buit shimram ba thymmai bala mynjur da ka Kynhun Myntri ha ka sngi Palei.
U Myntri Rangbah ka Jylla Conrad K Sangma ula iathuh hadien ka jingialang jong ka kynhun Myntri ba ka Sorkar kala mynjur ia ka Medium-Term Debt Management Strategy (MTDS) na ka bynta u snem 2027-28 haduh 2029-30, kaba pynurlong ia ki kyndon pynkylla thymmai hapoh ka SASCI na ka bynta u snem 2026-27.
U Conrad ula batai ba ki Jylla ki shimram ha ki lai jait ki ram –kaba 1 haduh 5 snem, 6 haduh 10 snem bad 11 snem shaneng-bad ka sut ruh ka iapher hapdeng jong ki.
“Ki Jylla barabor ki ju shim ia ka ram ba khyndiat snem namar ka sut ka kham rit da ki katto katne point” ula ong.
U iathuh ba ka Meghalaya, kala bud ia kane kajuh ka rukom shm ram ban tyngkai ia katto katne klur ha ka jingsiew sut. Ka por ha ka jingshim ram ia mynta ka long san snem shiteng haduh hynriew snem.
Hynrei ka Sorkar Pdeng ka kwah ba ki Jylla kin shim noh da ki ram ba bun snem – la kumno kumno ruh phra snem shaneng – ban pynthikna ia ka jingiaid beit katjuh ba neh bun snem, ka jinglah pyniaid bha ia ka ram bad ban pynneh katjuh ia ka bond mrket.
Kane ka jingkynriah, u ong, kan don lang ia ka jingmyntoi bad ki jingktah, naba ka sut ka lah ban kylla, hynrei ka ai pat ia ka jingshim ram ba long katjuh kaba iaid bun bun snem.
Da kane ka jingmynjur, ka Jylla Meghalaya kan sa ioh shuh shuh ia ka song pisa ba T.100 klur hapoh ka SASCI.
“Shisien ba ngi la leh ia kane, ngin sa ioh shuh shuh ia ka song pisa ba T.100 klur na ka SASCI naba ka jingpynkylla thymmai kala jia bad ngi la leh mynta ka sngi” ong u Conrad.

