“Ka jingkem iaki Nongialam kan ym pyntlot ia ka KSU “ | Pynbna u President barim ban bteng ka jingiakhih

Shillong, Nailar 20: U President barim ka Khasi Students’ Union (KSU) Bah Lambokstar Marngar ha ka sngi Palei, ula ong ba ka jingkem ia ki nongialam kan ym pyntlot ia ka Khasi Students’ Union hynrei kan nang pynjur ia ka jingiakhih ban pynurlong ia ki san tylli ki mat jingdawa.

U Bah Lambokstar ula kynthoh ia kane halor ka jingkem ia u Presidet samla Raymond Kharjana, Vice President Pynkmenlang Sanmiet bad General Secretary samla Reuben Najiar, bad ka jingkhynra ki Pulit ia ka Ophis ka KSU ha ka miet sngi Balang.

Ula pynrem ia ka jingkhynra bad kynnoh ba ki Pulit kila pynjulor ia ka Ophis bad ki iing ba marjan bad thombor ruh ia ki nongshongshnong ka thain.

“Lai ngut ki nongialam ba hakhmat kila shah kem. Kaei kaba ngi pynrem ka long ba hadien ba kem ia ki, kila wan bad pynjulor ia ka Ophis bad ruh ia ki iing ba marjan. Kane ka dei ka bym lah ban pdiang” ula ong.

“Hooid, ki Pulit ki hap ban leh la ka kamram, hynrei ka dei ban long ha ka lynti kaba dei. Ki don ki Rangbah Shnong bad ki Seng Samla. Ka rukom wan rung jong ki sha Shnong ka long kumba ki thwet ia ki kaikhlaw. Kila kren ia ki ktien sih, byrngem bad pyntieng pynsmiej. Ki tyndong lyer pynsat khmat kila rung sha ki iingbrirew bad ki khunlung khynnah kila tieng” ula kynnoh.

U bah Lambok ula ong ba ka KSU kam dei kaba don tang lai ngut ki nongialam.

“Ka KSU kam don tang lai ngut ki nongialam. Ka don bun bah ki nongialam na ki District bad ka CEC. Ngim tieng ia ka jingshah kem. Phi lah ban kem iano iano ruh, hynrei ki ishu kin iai bteng” ula ong.

U ong ba ki san tylli ki mat jingdawa kim dei kiba thymmai bad ka Sorkar ka dei ban pyntreikam ia ki ha ka jaka ban leh klet ia ki ishu.

“Ka jingleh jong ka Sorkar kan ym pynlip ia ka ding hynrei kan nang ai petrol ban pynkhlain ia ka jingdawa. Ngi sngew ba ka Sorkar ka kham khein kongsan ia ka Shree Cement ban ia ki ishu kiba ktah ia ki paid trai muluk” ula ong.

Halor ka huri hura ba mih na ka rally thuk thuk ha kaba 31 tylli ki kali kila shah pynjulor, u Bah Lambok ula ong ba ki runar lehse kila bsuh khlieh ha ka rally ban pynjah burom ia ka KSU.

“Ka KSU kala pynshai ba ki don ki riewshimkabu ha ka rally. Ha ki 9 snem ba nga ialam ia ka KSU, nga la iohi ia ki jingpyrshang ban pynpulom ia ki prokram ka seng. Ha u 2013 ruh,ka KSU kala shah kynnoh bat hang kali hynrei ki Pulit hadien kila ioh kem ia arngut ki bar Jylla” ula ong.

“Ngin ym iakhih da ki tiar ialeh hynrei da ka jingstad” ula bynrap.

Haba pynshai ba ka jingiakhih kam dei kaba pyrshah ia ki briew na Assam, ula ong “Ym dei ban khmih ia ka kum ka jingpyrshah ia ki nong Assam. Ka jingiakhih ka long pyrshah ia ka Sorkar Meghalaya kaba la sngap jar halor kine ki mat jingdawa”.

Haba ther ia ka Sorkar Jylla, u Bah Lambok ula ong “Ia phi lah buh ban shong ha Secretariat da ki paidbah. Wat pyrkhat ba u CM, Myntri kam Pohiing lane MLA ka dei ka kam ba shirta. Ka dei ka kam contract ba san snem. Ki paidbah ki don ka bor ban weng ia phi”.

Haba pyndonkam ia ka ktien pharshi, ula maham “Haba u thyrnia u ialam, u ksai u bud beit. Kaei ka ban jia hadien, ka Sorkar kan hap ban shim ia ka jingkitkhlieh”.

Halor ka jingweng noh ia ka jingbit ban shong kyllain mungor ha Khyndailad, ula ong “Wat lada ngi pan, u DC un weng noh ia ka. Naba ka Sorkar kala theh petrol ia ka dong, ai ba ka Sorkar kan jubab”.

Haba kylli la ka KSU kan dawa pynlait noh ia ki nongialam, u bah Lambok ula ong “Ka jingdawa ba hakhmat jong ngi ka long ban pyntreikam ia ki san tylli ki mat jingdawa. Lada pynlait ne ym pyllait, ka jingiakhih bad ki ishu kin iaid beit shakhmat”.

Ki san tylli ki mat jingdawa jong ka KSU ki kynthup ia ka jingdawa ban pynshitom ia ki Ophisar (DC, SP bad Ophisar MSPCB) halor ki jingjia ba mih na ka public hearing ba 31 tarik Naitung jong ka Shree Cement ha East Jaintia Hills, pyntreikam pura ia ka MRSSA katbym pat pyntreikam ia ka ILP, pynieng ia ki facilitation centre ha baroh 18 tylli ki entry point ha Khasi bad Jaintia Hills, pyntreikam ia ka Migrant Workmen Act, 2020 bala pynkylla, pynkylla ia ka thungkam thungkam ha NEIGRIHMS, weng noh ia ki interview thep kam jong ka Grade B, C & bad wanrah ia ka SOP ha baroh ki recruitment boards.