Imphal, Nailar 20: Ka sorkar Manipur ka la bthah ban khang khyrdep ia baroh ki jaka pule ha kylleng ka jylla na ka bynta lai sngi lynter naduh ka 20 haduh ka 22 tarik Nailar namar ka jinglong jingman jong ka ain bad ka suk ka sain kaba don mynta.
Ka hukum ba la pynmih da ka tnad pule puthi ha ka sngi Balang ka la ong ba ka jingkhang kan kynthup ïa baroh ki skul, ki kolej bad ki jaka pule ba kham heh, kynthup ïa ki skulbah, khlem da kheiñ ïa ka kynhun ne ka jingpynïaid jong ki.
Kane ka hukum ka treikam ïa ki jaka pule kiba ïasoh bad ka Board of Secondary Education Manipur, ka Council of Higher Secondary Education Manipur bad ka CBSE, kumjuh ruh ïa kiwei pat ki skul bad ki jaka pule kiba hap hapoh ka sorkar, ki bynta ba ïoh jingïarap bad ki bym ïoh jingïarap.
Ka jingkhang kan dang treikam naduh ka sngi Palei, 20 tarik u Nailar, haduh ka sngi Saitjain, 22 tarik u Nailar.
Ia katei ka hukum la pynmih da u Ningthoujam Geoffrey, Commissioner-cum-Secretary, School Education, Higher & Technical Education, Adult Education and SCERT, da ka hukum bad ha ka kyrteng jong u Lat ka jylla Manipur.
Ka tnad ka la bthah ïa ki ophisar ba dei peit, kynthup ïa ki director jong ka tnad pule puthi bad ka SCERT, baroh ki Deputy Commissioner bad ki Zonal Education Officer, ba kin pynphriang ïa kane ka hukum sha ki jaka pule bad ban pynthikna ïa ka jingpyntreikam ïa ka.
