Pynrem ka JNC ba shah khynra ka Ophis KSU, kem ia ki nongialam | Suba leh buit sain pyrthei

Shillong, Nailar 20: Ka Jaintia National Council (INC), Central Executive Committee, kala pynrem jur iaka jinghiar khynra ki Pulit ia ka Ophis ka Khasi Students’ Union (JSU) bad ka jingkem ia ki nongialam bahakhmat ka seng hadien ki jingjia kam thombor ha ki kynta rally thuk thuk ka KSU ha ka sngi Balang.

Ha ka kyrwoh, u President ka JNC Sambormi Lyngdoh ula ong ba ka JNC kam pynksan satia ia kino kino ki kam thombor hynrei ka buh jingkylli ia ka rukom leh ha ka jingkem ia ki nongialam ka KSU.

“Haba pynrem ia ka jingleh ki Pulit, ka JNC kam pynksan ne kyrshan ia kano kano ka jingjia kam thombor, ka huri hura kaba lah ban mih ha ka por ba long ka rally. Kum ka seng ki samla, baroh ki jingiakhih paidbah ki dei ban long kiba jai jai” ong u bah Sambormi.

Ula ong ba ki huri hura kiba mih ki long kiba sngewsih khamtam ba ki lah ban pynmih ia ka jingsngew thuh bakla bad ka jingiakynad hapdeng ki paidbah ka Meghalaya bad Assam.

U Bah Sambormi ula ong ba kam ju jia kot ba ka Ophis jong ki seng sam pule kin shah khynra bad ban kem mardor ia ki nongialam.

“Bun ki jingiakhih bad ki huri hura kila mih ha kylleng ki jaka ha ki snem bala leit, hynrei kam ju jia pat ba ki Ophis ki seng samla pule kin shah khynra bad ki nongialam ba hakhmat kin shah kem mardor. Kane ka pynsuba jur ba a lah ban don kaei kaei ha lyndet ne ka jingbthah ba wan na lyndet” ula ong.

“Ka jingthmu jong kano kano ka jingiakhih paidbah ka long ban pynsngew ia ka sur bad ka jingsngew khia u paidbah sha ka Sorkar. Ngi buh jingkylli balei ba la kem beit beit ia ki nongialam ka KSU khlem da pynlong shuwa ia ka jingtohkit bym shah liang” ula bynrap.

Ka JNC kala pyniasnoh ruh ia kane ka jingjia bad kaei kaba jia halor ka Shree Cement ha East Jaintia Hills, haba kynnoh ba ki kam jong ka kompani kala wanrah ia ka jingiapait iapra hapdeng ki Jaidbynriew bad hapdeng ka Elaka Nongkhlieh bad Elaka Sutnga.

Haba kdew ia ka public hearing ba long ha ka 30 tarik bad 31 tarik Naitung, u Bah Sambormi ula kynnoh ia ka jingpyndonkam palat pud ki pulit ia ka bor.

“Ha ka 30 tarik, ki nongialam ka JNC kila shah kem bad ki kali bad ki briew kiba pyrshang ban leit sha ka Public Hearing kila shah thombor daka jinglun maw. Ki Pulit kim shym la lah ban leh eiei ia kane khlem ka jingbthah na ki bor kiba halor” ula ong.

Ka JNC kala buh jingkylli ruh ia ka jingkren jong u Secretary bad Dolloi ka Elaka Nongkhlieh ba ki kynhun ba kyrshan bad ki kynhun ba pyrshah kila shah khot lang sha ka public hearing.

“Ngi buh jingkylli, ki dei kiei kine ki breiw kiba don ia ka bor ban khot ia ki briew?. Hato ka Elaka ka dei kaba pynlong ia ka public hearing” ula ong.

Haba kynnoh ba don ki bor nabar kiba kynshoit ha lyndet ka jingkem ia ki nongialam ka KSU, ula ong “Ka JNLC ka suba jur ba kito kiba donkti ban leh ia ki kam thombor ha ka rally hynnin ka sngi ki lah ban nym dei ki dkhot ka KSU. Lada kam don kano kano ka jingmut sniew na lyndet, balei ka Sorkar ka leit ban kem beit beit ia ki nongialam ba hakhmat ka seng?”.

U Bah Sambormi u pyntip ba ka jngaipor ka JNC ia ka Sorkar halor ki mat jingdawa ruh kan kut noh ha ka 23 tarik Nailar bad hadien kane ka Central Executive Committee kan sa shong ban shim rai ia ki sienjam ban leh ki ban long kat kum ka riti synshar.