Shillong, Nailar 19 : Ki Pulit ka Jylla, ha ka miet sngi Balang, kila kem ia lai ngut ki nongialam ba hakhmat ka Khasi Students’ Union (KSU) ba kynthup ia u President, General Secretary bad u Vice President namar ki kam thombor ha ka rally thuk thuk ha Shillong.
Kine ki nongialam ka KSU ki dei u President samla Raymond Kharjana, Vice President samla Pynkmenlang Sanmiet bad General Secretary samla Reuben Najiar.
Kat kum ka khubor Pulit, ia kine ki nongialam ka KSU la pynngat ha ki kyndon bapher bapher jong ka Bharatiya Nyaya Sanhita 2023 ba kynthup ia ka kyndon ba pynjulor ia ki nongkynti paidbah, pynmynsaw ia ki nongleit nongwan, pynkhein ain bad kiwei kiwei.
Ia kine ki nongialam ka KSU la kit sha Sadar Police Station ban pynlong ia ka jingtohkit.
Kane ka jingkem kala jia tang hadien katto katne por ba kine ki nongialam kila iakynduh ia ki lad pathai khubor ban pynshai ia ki jingjia kiba jia ha ka rally thuk thuk, kaba lam sha ka jingjulor haduh 31 tylli ki kali, bad bun ngut kiba mynsaw namar ka jingshah shoh.
Ka rally thuk thuk ka KSU ba long hynne mynsngi, kala sakhi ia ki jingjia lun maw ia ki kali, pynjulor ia ki kali ba wan nabar Jylla, thang ia ka kali Sorkar bad shoh ia ki nongiaid lynti ha kylleng ki jaka.
Na ka liang ki nongialam ka KSU kila pynpaw ia ka jingsngewkhia bad sngewsih ia kaei kaba jia ha kane ka rally bad kynnoh ba dei ki riewshimkabu kiba leh ia kane ka kam tang ban pynthohbria bad pynpulom ia ka jingiakhih bad ki jingdawa jong ka Seng.
