Dei ki riewshimkabu ba kwah pynpulom ia ka jingiakhih ka seng, ong ki nongialam
Shillong Nailar 19: Ka Khasi Students Union (KSU) ha ka miet sngi Balang, kala pynbna ban pynsangeh noh ia ka jingiaid rally ha ka 21 tarik Nailar hadien ka jingkylla kam thombor ka rally thuk thuk hynne ka sngi, ia kaba ka seng ka ong ba dei ka jingleh ki riewshimkabu ban pynthohbria bad pynpulom ia ki mat jingdawa ka seng.
Kala pynbna ruh ba ha ka jaka jong kane ka rally, kan pynlong noh da ka Sit In Demonstration lane ka jingiashong kyllain mungor.
“Ngi pynpaw ka jingsngewsih halor ki jinglong jingman bad ki jingjia kiba la jia ha ka rally thuk thuk” ong u President ka KSU samla Raymond Kharjana haba iakren bad ki nongthoh khubor.
“Ka seng kala pynlong ia ki jingialang paidbah bad kine kila iaid beit iaid ryntih bad long kiba jai jai, hynrei ki runar kila shim kabu na ka rally thuk thuk bad leh ia ki kam da ka jingthmu ban pynpulom ia ka jingdawa bad ia ki ishu jong ka seng” ula bynrap.
U samla Raymond ula ong “Ka Seng ka kwah ba ka jingiakhih kan long kaba jop….kumta ngi la rai ban pynsangeh noh shuwa ia ka ‘public rally’ bala buh ban long ha ka 21 tarik Nailar bad ngin pynlong noh da ka jingiashong kyllain mungor”.
“Ka Seng kala pyrkhat lypa ba kin don beit ki riew shimkabu ban pynpulom ia ka jingiakhih bad ia ki jingdawa kumba la jia ha u snem 2013 ha ka por ba iakhih ILP. Ha katei ka por, ki Pulit kila ioh kem ia ki briew kiba dei ki bar jylla bad ioh kurup ruh ia ka petrol na ki” ula ong.
Halor ki jingjia hynne ka sngi, une u nongialam ka KSU ula ong “Ngim shym poi pyrkhat ba kila don ba ioh rung hapoh ban pynpulom ia kane ka jingiakhih bad ka Seng kan sa wad ia kine ki riewshim kabu”.
Haba kylli la ka KSU kan ai ka jingiatreilang bad ki Pulit ban wad ia kine ki riewshimkabu bad la ka seng ka don jingsuba iano iano, u samla Raymond ula ong “Ka Seng ka long kaba kloi ban ai ka jingiatreilang. Ia mynta hi ngim pat lah ban kynnoh iano iano ruh la u dei u A ne B khlem da don ia ki sakhi sabut kiba biang”.
U General Secretary ka Seng samla Reuben Najiar ula kyrpad ia ki paidbah ba kin ym thew bad ban ym bein ia kaei kaba jia hynne ka sngi namar ka Seng kam shym poi pyrkhat ba ki thuk thuk bad ki kali kin poi da ki spah tylli bad mih ki riew shimkabu. “Ngim mutdur ban jia kumne namar baroh shikatta ki jingialang jong ngi ki long kiba iaid beit bad long kiba jai jai” ula ong.
Haba kyrpad ia ki paidbah ba kin kyrshan ia ki jingdawa ka seng, ula ong “Ha man ki jingialang bad wat haba sdang ia ka rally thuk thuk ruh, ngi la sdang da ki jingduwai khnang ba ki jingdawa bad ka jingiakhih jong ngi kan long kaba jop”.
 ha ka miet sngi Balang, kala pynbna ban pynsangeh noh ia ka jingiaid rally ha ka 21 tarik Nailar hadien ka jingkylla kam thombor ka rally thuk thuk hynne ka sngi, ia kaba ka seng ka ong ba dei ka jingleh ki riewshimkabu ban pynthohbria bad pynpulom ia ki mat jingdawa ka seng.){kind=link}