Shillong, Nailar 3: U Symbud Myntri Rangbah ka jylla Bah Sniawbhalang Dhar ha ka sngi Nyngkong ula pynpaw ia ka jingsngewlem halor ka jingshlei um kaba ka jia ha jylla Assam bad ula ong ba ka Sorkar Meghalaya kala long kaba la kloi ban iakynduh ia ka Sorkar Assam ban pynbeit ia kano kano ka mat da ka jingiatreilang.
“Ka long kaei kaei kaba sngewsih khamtam ia kaei kaba jia ha Assam. Kane kala ktah jur ia ki paitbah bad nga phah ia ka jingsngewlem sha kito kiba la duh noh iala ki jingim” ong u Bah Dhar haba iakren bad ki nongthoh khubor.
U Symbud Myntri Rangbah ula ong ba ula dep kren ia u Myntri Rangbah ba dei ban pynlong noh mardor ia ka jingialang bad u Myntri Rangbah ka Assam.
“Nga lah dep ong ia u Myntri Rangbah ba ngin iakynduh ia u Myntri Rangbah ka Assam.
Ngin iakren bad ngin ia pynbeit lang. Ngim don hangne ban ia kynnoh iwei ia iwei pat. Ngi don hangne ban trei na ka bynta ki paitbah” ula ong.
U Bah Dhar ula banjur ba baroh ar ki sorkar ki don ia ka histori ban ia shimkhia lang ia ki jingeh khamtam ia kito kiba iadei bad ki lad pyniasoh ha ka leit ka wan.
“Nga kren shai ba lada ka don kano kano ka jingeh ha ki surok ne surokbah, ngi kum ka sorkar ne baroh ar ki sorkar, ngin ia pynbeit lang. Kam don kano kano ka jingeh” ula bynrap.
Halor ka jingkylli halor katei ka jingialang kaba la tyrwa, u Bah Dhar ula ong ba ka jingiakren kan long ha ka rukom kaba biang ban wad ia ki lad ki lynti kiba biang tam ban iaid shakhmat.
“Baroh ar ngin sa iakynduh bad ngin sa iakren ha ka rukom kaba biang. Ngin pyrshang ban wad ia ki lad kiba biang tam. Ngi lah long kiba kloi ban leh ia katei” ula ong.
