Shillong, Nailar 03 : U Symbud Myntri Rangbah Bah Sniawbhalang Dhar ha ka sngi Nyngkong, ula ong ba ka jingkhang jong ka Sorkar ka plie ia baroh ki seng sain pyrthei haba kyntu ia ki nongmih khmat paidbah ba kim dei shu kyntur ia u paidbah ban iakhih namar la jied ia ki ba kin kren ia ki jingeh u paidbah beit beit bad ka Sorkar.
Haba kynthoh ia ka jingthmu iaid paidbah ka Voice of the People Party (VPP) sha Secretariat la 6 tarik Nailar, u Bah Sniawbha ula ong ba ka jingiakren ka dei ka lynti kaba biang eh ban weng ia ki jingeh.
“Ha ka jingshisha, kam donkam ia ki (VPP) ban wan iatur paidbah. Ki lah ban wan bad aiti ia ka dorkhas ha ka lynti kaba dei sha u Myntri Rangbah. Ngi lah ban iakren bad iasyllok-kane ka dei ka lynti ba kumno ngi pyniaid ia ka Sorkar” ula ong haba iakren bad ki nongthoh khubor.
U Symbud Myntri Rangbah ula ban jur ba kum ki nongmihkhmat paidbah ki long laitluid ban iakynduh ha kano kano ka por ia ka Sorkar.
“Khlem pep, lada don kino kino ki ishu ba kyrkieh na kino kino ki seng sain pyrthei, ki don ia ka hok ban iakynduh ia u Myntri Rangbah lane ka Sorkar. Ki long kiba la pdiang. Lada ki wan bad buh ia ki mat lane ki jingeh jong ki, ngin sa iakren. Kam don jingeh eiei ruh em” ula ong.
“Baroh ki MLA bad MDC ki dei ki nongialam u paidbah. Ki don ia ka hok ban iakynduh ia u Myntri Rangbah bad ka Sorkar, bad ka jingkhang ka long kaba plie beit ia ki baroh 24 kynta” bynrap u Bah Sniawbha.
Ula pynpaw ba ka Sorkar kan pdiang ia ka VPP sha ka jingiakren watla ka wan tang khyndiat ngut ki briew.
“Ngin pdiang beit ia ki wat lada ki wan tang 3 ne 5 ngut ki nongialam, kumba ngi ju leh bad kino kino ki kynhun ba iakhih, Lada wan mano manor uh, ngi long kiba pdiang ia ki. Ai ba un CM un pynbeit” ula ong.
U Bah Sniawbha ula buh jingkylli ia ki nongrim ha lyndet ka jingkhot ia u paidbah ban iakhih halor ki ishu kiba lah ban iakren ha ki jingialang.
“Lada dei ka ishu ba rit ba ria ruh, ka mut ngi hap ban khot ia u paidbah ban iatur sha Secretariat- kaei ka jingmut ba ki paidbah ki jied ia ngi?. Ngi la shah jied ha u paidbah ban mihkhmat na ka bynta ka jingeh jong ki. Ia ki ishu barit, lada ngi khot ia u paidbah ban iamih bad iatur sha Secretariat, kane kam dei satia ka lynti” ula ong.
“Ka dei ka kamram jong nga kum u MLA ban iakynduh ia ka Sorkar ban iakren ia ki jingeh jong ka constituency jong nga” ong u Bah Sniawbha.
Ula pynpaw ruh ba bun na ki ishu bala pynpaw da ka VPP ki dei kiba la don hapoh ka jingiakren bad ka Sorkar kala kut jingmut ban pynbeit ia ki na ka bynta ka bha ka miat jong u paidbah.
