Shillong, Naitung 24 : U Myntri ka Tnad Pule Puthi Bah Lahkmen Rymbui ha ka sngi Thohdieng ula pynlait ia ka Meghalaya School Performance Grading Index (MSPGI) 2025-26, kaba dei ka rukom bishar ba thymmai ban pynwandur ia ka jingtreikam ki skul, kaba thmu ban pynbha ia ka rukom pynkhreh bad ka jingkitkhlieh ha ka kam pule puthi ha baroh kawei ka Jylla.
Hapoh ka jingpynkhreh da ka Tnad Pule Puthi da kaba pyndonkam ia ka UDISE + 2025-26, ka MSPGI kan bishar bniah ia baroh ki 11,443 tylli ki skul bala ithuh da ka Sorkar ha baroh ki 12 tylli ki district ka Jylla. Ka jingbishar kan long halor ki 43 tylli ki nongrim kiba don haduh san bynta-ka jinglah ban ioh (Accessibility), Pule Digital, ki jingtei ba donkam, ki kam ba iadei bad ka National Education Policy, bad ki jingther ia ka jingbha ka rukom ai jinghikai-da ka jingkhein kaba heh tam kaba long 1000 point.
Ha kane ka rukom treikam, man ki skul kin ioh ia la ki jong ki School Report Card kiba batai shai ia ka jingioh point, ka performance grade bad jingai kyrdan.
Haba kren ha ka jingialang, u Bah Rymbui ula ong ba ia ka MSPGI la pyrkhat ym kum ka kam ban ai kyrdan hynrei kum atiar ban pynbha bad ban iapyrkhat ia ki kam ba dei ban leh.
“Ka jingthmu ka long ban iarap ia ki skul ba kin sngewthuh ia la ka jong ka bor treikam bad ki jaka kiba donkam ban hap leh eiei. Ka wanrah ia ka ktien ba iasngewthuh lang bad kaba shai na ka bynta ki Khlieh pyniaid skul, ki Nonghikai, ki Managing Committee ki skul, ki bor Sorkar ha ki Block bad District nalor ki nongpyrkhat kam ha Jylla ba kin don ia ka jingiasyllok kaba tei halor ka jinglong ba khreh jong ki skul bad ban bthah ia ki jingkyrshan sha ki kam ba donkam tam” ong u Myntri.
Kat kum ka jingong ka Tnad, ia ka jingai mark la sei napoh ka UDISE + dawa bala pyndap, dep pynskhem bad bala ai pynshisha dalade da ki skul ban pynthikna ba ka jingbishar kan shong eh ha ki jingai jingtip kiba dei hok.
Ia ki skul la buh ha ki 17 tylli ki performance grade, kaba long naduh ka Utkarsh (Outstanding) kaba ha khlieh duh sha ka Akanshi-10 (intersive support) na ka bynta ki skul kiba donkam ia ka jingtuklar ba kham bun. Kane ka jingai kyrdan ka ailad ban bishar ia ki skul na ka jingai ia ka pule dangle kaba bha ban ia kaba pynianujor kawei ia kawei pat.
Haba pyniaid kat kum ka PGI ka Ri, ka MSPGI ka dei kaba la pynwandur halor ka Performanace Grading Index jong ka Ministry of Education, ka Sorkar India. Katba ka PGI ka Ri ka shong bishar ia ki Jylla bad ki UT, ka MSPGI ka leh ia kajuh ka nongrim na ka bynta ki skul.
Ka Tnad ka pynpaw ba ka Meghalaya State-Level PGI score kala kham kiew kaba long na ka 401.62 ha u 2022-23 sha ka 525.71 ha u 2025-26, kaba rah ia ka kyrdan ka Jylla na ka Akanshi-3 sha ka Akanshi-1- ka sien ba nyngkong ba kala mih na ka thup jong ka kyrdan ba hatrai duh hapoh ka PGI 2.0.
