Shillong, Nailur 23: U Myntri Rangbah ka Jylla u Conrad K Sangma ha ka sngi Balang ula ong, ba ka sorkar ka dang ialeh ban pynbeit noh ia u pud u sam uba la sahteng bad ka jylla Assam, hynrei ula banjur pat ba ia ka mat kaba lah sahteng mynta la 54 snem naduh ba lah ioh ia la ka jong ka jylla yn ym lah ban khmih lynti ban pynbeit noh shimiet.
Kane ka jingkren ka jongu kadei hadien ba kala mih ka jingiakajia ha ka thain khappud kaba la jia hapoh Shnong Maikhuli.
“Ka jingiakajia ha khappud kadei kaba la jia mynta la 54 snem naduh ba ngi la ioh ia la ka jylla. Kam dei kaei kaei kaba la jia hynin ne mynshi sngi” ong u Sangma ia ki nongthoh khubor.
Ula ong ba kum kitei ki jingjia kila jia tang shisien lano eh haba mih ka jingiakajia, ki jingdon ia ka jingiapher jingmut ha ka thain khappud.
“Kumta, kadei ka lynti iaid ka jong ngi ba ngin ia kren man la ka por bad ban iatreilang bad ki paralok kiba na kawei pat ka liang ha ki kyrdan ki bapher bapher ban pynthikna ba ngin ailad ba ka jinglong jingman kan long kaba biang” la ong u Myntri Rangbah.
U Sangma ula ong, haba ialeh ban pynjaijai ia ka jinglong jingman ha ki shnong ki thaw, da kaba buh hakhmat eh ban don ka jingsuk, ka jingpynbeit kaba shirta kan shong eh ha kaban pynbeit noh ia u pud u sam.
“Ha ki por ban wan, kaba bha tam bad ka lad ban beit kadei ka jingpynbeit shirta ban weng ia katei ka jingeh. Hynrei ia katei ruh kam dei kaba lah ban jia da kaba suk namar ba kala long ka mat kaba lah dep ban don la 54 snem” ula bynrap.
Ula bynrap ba ka sorkar kala shim ia ki katto katne ki bynta ha ki katto katne ki jaka bad kan bteng ban pyrshang na ka bynta ki jaka kiba dang sah.
“Kumba phi tip, ha ki katto katne ki jaka ngi la lah ban shim bad pyniaid shakhmat ia ki sienjam bad ban wad ia ki lad ban pynbeit. Ngi ngin bteng ban trei na ka bynta ban wad ia ki lad ki lynti ban weng ia ki jingeh ha kiwei ki jaka ruh, hynrei kadei pat ka sobjek kaba eh bha, kaba la pynlong ia kiba bun ki sorkar ba kim shim la lah satia ban pynbeit ia katei ha ki 54 snem kiba la dep” ong u Sangma.
