Shillong, Nailur 23 : Ka Nongkseh SSCC ka la pynliem ia ka Rangdajied United FC da 2-0 ha ka Shillong Premier League 2026 hynne ka janmiet sngi Balang ha SSA Stadium, Polo.
Da kane ka jingjop, ka Nongkseh kala beh biang sha ka jingiakhun ban iaknieh rah ia ka nam lahduh jong kane ka lympung.
Kane ka jingjop kala pynioh ia ka Nongkseh SSCC 10 point bad duna lai point ia ka Langsning FC kaba bat ia ka kyrdan ba halor duh, katba na ka liang ka Rangdajied kan iai neh ha ka kyrdan ba hynniew hadien ba ka la ioh ba kan khur 7 point.
Ia ki artylli ki kol ka Nongkseh SSCC la thep lyngba u Dawanchwa Challam (66’) bad Aenam Jyrwa (85’).
Hynrei haba phai pat sha ka jingiakhun, kampher wat lada ka Rangdajied ki la mad ia ka nam rem, hynrei u sawar jong ka nam ialehkai ba bha ka la noh sha sha kane ka kynhun, kaba ka jingshah thep ba syndet jong kine ki artylli ki kol, ki wan hapdeng ki sekon bad minit kaba ki khynnah ialehkai ki jong ka, ki la ieng iakhun bad khlem shah jem satia.
Ka kylla step kala sakhi ia ka jingialehkai bha jong ki khynnah ka Rangdajied bad kim shim la aili ne ailad da kaba suk ia ki rang ialehkai jong ka Nongkseh ba kin bat slem iaka bol ha ki kjat ki jong ki, da kaba ki tur, ki tynrah bad ialeh ban knieh beit ia ka bol.
Ka jingpyrshang ka Nongkseh ban pynkhih jar ha ka kylla step ka mih paw lyngba u Chesterpaul bad kumjuh ka freekick lyngba u Hardy Cliff Nongbri, katba na ka liang ka Rangdajied ki la ioh ia ki kabu ba kin shut ia ki corner, ia kaba kim shim la lah ban shna pynwandur bha ia ki ban lah ban pynkhih ia ka jar.
Hadien ba la shah tam shakhmat da ar kol ruh, ki khynnah ka Rangdajied ki iai bteng ban aiti met bad mynsiem hapdeng ka madan iakhun bad ha ka minit ba 79 u Micky Marwein u la lah ban pynbuh ia ka bol sha u Balamlynti Khongjee hynrei ha ka por ba u ioh ba un head ka bol, ka bol kala her pynban shabar, hadien kane u Franky Dkhar u la shut jam bha ia ka freekick shabar jong ka box kaba hangne ruh ka bol ka la poi shabar .
Lashai pat ka sngi, ka kynhun ba don ha ka kyrdan kaba lai ka Shillong Lajong FC kan mih madan ban aireng pyrshah ia ka kynhun kaba don ka jingma ba lah ban hiar noh na kane ka lympung ka Laitkor SC kaban long ha ka por 3 baje nohphai sngi.
