Shillong, Nailur 24 : Ki nonghikai deficit kin mih iakhih sha surok ha ka 25 tarik Nailur, haba kynnoh ia ka Sorkar ba kan pynslem ia ki jingkular barim bad pynbor iaki sha ka provident fund scheme ba thymmai ia kaba ki khot ba kam ieng satia kat kum ka ain.
Haba pynbna ia ka jingiakhih ha ka sngi Balang, u President ka Khasi Jaintia Deficit School Teachers Association (KJDSTA) Bah Boswell Pala ula iathuh ba ki nonghikai kin ialum shuwa hapoh ka por 11 baje mynstep hakhmat ka Ophis MBoSE bad sa iaid padbah sha madan Malki ban pynlong ia ka rally.
“Ka rally ka long ban pyni ia ka jingpyrshah ia ka Sorkar ka bym shym la sngap ia ki jingdawa bala slem bha” ong u Bah Pala.
U bah Pala ula ong ba ka jingiakynad ba kongsan ka dei halor ki jingmyntoi hadien ba shongthait. Ka kam halor ka jingpyntreikam ia ka CPF bad NPS kala sdang ha u 2023-24, hynrei ka Sorkar kala tynruh mynta ia ka Meghalaya Non-Government School and Colleges Employees Centralized Provident Fund Scheme 2026.
“Ngi la kyntait ia ka skhim 2026 naduh ka sngi ba nyngkong. Kam don nongrim kat kum ka ain” ong u Bah Pala.
Haba batai ia ki jingmyntoi ba dang sahteng, ula ong “Ngi dawa ban pynlait noh ia 51% bad 53% ka DA, ryngkat ka 53% ka pisa ba dei ban siew naduh u Naitung 2025, bad ka arrear ba 43% naduh u Kyllalyngkot bad Rymphang 2024”.
Kiwei ki jingdawa ki kynthup ia ka jingpyntreikam ia ka 10% ka synniang jong ka CPF na ka tulop, ka jingsiew tulop ba thikna man u bnai khlem ka jingpynslem, ka jingpyntreikam ia ka MACPS na ka bynta ki nonghikai deficit bad ka jingpyndap noh ia ki kam nonghikai deficit ba thylli ha ki skul.
“Ki don bun tylli ki kam kiba lait. Ngi dawa ia ka Sorkar ban thung briew noh kham kloi” ula ong.
U Bah Pala ula kren ruh halor ka jingpynduh noh ia ka Board of Trustee kaba iada ia ka pisa jong ki nonghikai kiba la thung kam hashuwa u Iaiong 2010.
“Ka dei ban don ka Board of Trustee na ka bynta ka pisa jong ngi. Kila pynduh noh. Wanrah biang ia ka Board jong ngi” ula ong.
Ula kyntu ia ki nonghikai deficit ki skul primary, upper primary, secondary, higher secondary bad college kynthup kiba la shongthait, ba kin iasnohkti lang ha kane ka rally ban pynbor ha kaban pynurlong noh ia ki jingdawa.
