Shillong, Naitung 24: Ka North-Eastern Hill University Students’ Union (NEHUSU) ha ka sngi Palei kala mih shakhamt ban ai jingkyrshan ia u Sonam Wangchuk bad ia ki samla pule ha kylleng jong ka ri India kiba iakhih halor ka jinglait tuh jong ki jingkylli ka eksamin NEET bad ka dawa ba u Myntri ka Sorkar Pdeng uba khmih ia ka pule puthi u Dharmendra Pradhan udei ban hiar shuki noh.
Ha ka kyrwoh, ka NEHUSU kala ong ba ka jinglait tuh ki jingkylli kala pynduh jingshaniah ia ka rukom pyniaid ia ki eksamin ha ka ri bad buh ha ka jingeh kaba khraw ia ki samla pule na kane ka rukom treikam kaba pulom ne ‘Fail’.
“Man la ki Competitive Examination ki pyni ia ka jingtrei shitom kaba baroh shi snem, ka duh thiah duh dem, ka jinglen ha kaba iadei bad ka liang ka pisa ka tyngka bad ka jingangnud jong kiba bun bah ki samla kaba ym lah niew shuh. Hynrei haba ka rukom treikam ka pulom, kin dei beit ki samla pule kin ban shah ieh ban mad ia ka jingeh” la ong ka Union.
Ka NEHUSU kala pynrem jur ruh ia ki khubor kiba la saphriang halor ka jingpyndonkam ki pulit da ka bor pyrshah ia kiba pynlong ia ka jingiakhih kaba jai jai.
“Kaba kham sngew sheptieng kadei halor ki khubor ba ki sama kiba iakhih da kaba jai jai, kila shah bom shah tied bad shah kem haba ki dang iashimbynta ban pyndonkam ia ka hok paidbah ban dawa ia ka hok. Ha ka kam synshar paitbah, dei ban sngap ia ki samla pule ym ban pynsngap jar” la ong ha ka kyrwoh bad ka ong, kum katei ka jingleh kam don jaka hapoh ka ri kaba la tei da ki nongrim kiba kordor ha ka riti synshar ka ri.
Ka Union kala buh jingkylli haduh katno ki samla pule kin bteng ban mad ia ki jingeh jong ki jingdkoh ia kaba kam dei satia kano kano ka jingkitkhlieh ka jongki.
“Sa katno ngut ki samla kin hap ban siew ia ka kuna na ka jingpulom ia kaba kim shim la thaw satia ma ki” kala buh jingkylli.
Kala dawa ba dei ban shim ia ka jingkitkhlieh da ki bor kiba halor eh, ka NEHUSU kala kyntu ia u Myntri ka Sorkar Pdeng uba khmih ia ka pule puthi ba udei ban shim ia ka jingkitkhlieh bad ban hiar shuki noh.
“Ban wanrah biang ia ka jingshaniah ki paitbah ha ka rukom long bad rukom pyniaid ia ka pule puthi ha ka ri, dei ban sdang da kaba shim ia ka jingkitkhlieh, ym da ki jingai jingkular” la ong ka Union.
Ka NEHUSU kala ong shuh shuh, ba ki samla pule kim shim la wad ia ka jingsngewlem ne jingsngewsynei hynrei ki dawa ia ka hok, ka jingbym shah liang bad ka jinglong khuid long suba ha ka rukom treikam ha ka liang ka pule puthi.
“Ngi iengskhem bad u Sonam Wangchuk bad baroh ki samla pule kiba iakhun ban ai ka jingiada ia ka pule puthi, ka jingpynneh ia ka jingdon ia ka rukom treikam kaba khuid ba suba bad ka jingdon ia ka jingkitkhlieh kaba ym dei satia ban iapein noh” la ong ha ka kyrwoh.
