Nongpoh, Naitung 23 : Ki Pulit ka Byrnihat ha ryngkat ki paidbah ka shnong Umdap Dumu bad Umdap Rngi, ha ka janmiet sngi Palei, kila ioh sei ia ka met jong uwei u rangbah uba shah tap ha ka khyndew hadien ka jingtwa u lum ha Umdap Rngi.
Kane ka jingtwa khyndew kala jia naduh ka 20 tarik Naitung hapdeng ka jingther u lapbah uba la neh kumba 3-4 kynta eiei.
La iathuh ba khyndew ba twa na une u lum kala leit tuid sha ka Iingtrep ba sah une u rangbah haba leit rep, kaba don hapdeng ka khlaw.
La iathuh ba une u rangbah uba dei na Byrnihat, u ju leit sah sha katei ka iing haba leit rep ha katei ka khlaw la bun bun snem. Hynrei dei hadien ka jingbym wan phai sha iing la bun sngi, ki bahaiing kila suba ba la jia eiei ia une u rangbah bad mar mar kila leit wad sha katei ka khlaw bad lap pynban ia ka jingtwa khyndew.
Ha kane ka jingleit wad, ki bahaiing kila lap ba ka khyndew kala tap ia ka iingtrep bad mar mar kila pyntip sha ki bor shnong bad sha ki Pulit ka Byrnihat ba kin ai jingiarap.
Mar syn tip ia kane ka jingjia, ki Pulit ka Byrnihat bad Fire & Emergency Services lem bad ki briew shnong, kila leit wad ia une u rangbah ha katei ka jaka bad hadien 3-4 kynta eiei, da kaba pyndonkam ia ka puhshilum, kila ioh sei ia ka met ha ka por 4 baje janmiet.
