Mon, Naitung 24: Lah jan shi taiew hadien ba ka jingther u slap ka la pynjulor ïa ki bynta jong ka sor Mon, ki bor pyniaid ki la thmu ban pynsangeh noh ïa ka jingwad briew ha ka sngi Thohdieng.
Ha kane ka jingjia, ki Kynhun ai jingiarap kila lap ïa hynriew tylli ki metïap bad arngut ki dang jah rngai.
Ka jingtwa khyndew ha ka 19 tarik Naitung, kaba la jia na ka jinghap u slap ba khlem sangeh, ka la tep ïa ki ïing ki sem ha ka Defence Colony jong ka Walo Ward bad Thamnan Ward, ha kaba ka la iehnoh tang ïa ka dien jong ka jingshah pynjot.
Ki kynhun ai jingïarap kiba kynthup ïa ki bor pynïaid District, District Executive Force, State Disaster Response Force (SDRF), 42 ngut ki shipai Assam Rifles, ki pulit, ki seng trei mon sngewbha na ka thaiñ ki la ïaid shakhmat ban wad ïa ki lyngkhot lyngkhai naduh ba jia kane ka jingjia ba sngewsih.
La lap ia saw tylli ki met iap ha ka sngi ba jia katei ka jingjia, katba ar tylli pat la lap ha ka 20 tarik u Jylliew, wat la la wad bniah da ki sngi hapoh ka jinglong ka suinbneng kaba eh bad ki jaka kiba don jingma, hynrei arngut ki briew kiba la jah kim pat lap satia.
Ki heh ophisar ki la ong ba ïa kane ka jingwad bniah, kaba la kyrshan bha da ki nongtrei mon sngewbha na ka thaiñ bad ki sengbhalang, la khmih lynti ba yn pynkut noh ha ka sngi Thohdieng hadien ba la jan shi taiew ka jingpyrshang ban ïoh biang ïa kiba la jah rngai.
