Nongpoh, Naitung 23: Naka jingther u lapbah uba la neh katto katne kynta haka step 20 tarik Naitung, ki Nongshong Shnong ka 17 Mile, Pahamlang, Umling C&RD Block ki la mad ia shibun ki jingeh na ka jingshlei um kaba la wan rung shaduh ki iing ki sem haduh u pud ba kila hap kit iala ki khun ki kti sha ki jaka kiba shngain.
Kiba bun ki longiing kila duh ia ki jingdon jingem kiba don ha Iing, nalor ki jingthung jingtep ha ki jaka rep, ha kaba la khein antad ba ka jingduhnong ka kot sha ki 40-50 lak eiei.
La kynnoh ba kane ka jingshlei um ka dei na ka daw ka jingpynhap maw u MLA ka Mawkyrwat Bah Renikton Lyngdoh Tongkhar, ha ka nala kaba la pynlong ia ka um ba kan lang bad tur sha ki jaka sah ki briew.
Haduh 17 tylli ki longiing kila leit iakynduh ia u Addl. Deputy Commissioner Bah Jonathan Shylla ban pynsngew ïa ki jingeh ba kila iakynduh haka jingsynran lang ki Longkmie bad ka Ribhoi People Council.
Haba kren sha ki lad pathai khubon, Ki 3 Ngut ki longkmie ki la pynpaw iaka jingdiaw mynsiem ba katei ka apot ka la wan jia haka Shnong jong ki.
Ki la iathuh ruh ba kum kane ka jingshlei um kam pat ju jia satia ha kane ka shnong ba kila im la sah da ki phew phew snem.
U Bah Jayson Lenox Nongrum, President ka RBPC u la ther ia ka jingleh bym suit niew u MLA ka Mawkyrwat ba lyngba ka jingleh jong u, ka la pynlong pynban iaki nongshong shnong ba hap ban mad iaki jingeh kiba bun.
U Bah Jayson u la kyntu iaka bor District ba ka dei ban shimkhia mardor ia kane ka jingeh ki paidbah bad ki la dei ban phah leit jurip mardor khnang ban lah ban pynpoi iaki jingiarap kiba kyrkieh sha kitei ki longiing.
Ula ban jur ba dei ban pynbeit kloi ia kane ka jingeh bad ba ym dei ban pyn ap sah iaki paidbah haduh ban da poi biang ka por slap.
