Shillong, Naitung 17: U General Secretary barim ka Khasi Students Union (KSU) u Samla Donald V Thabah ula ong, ba lada kiwei ki jaitbynriew kiba wan buhai shnong hapoh ka Meghalaya ki ioh ban rah ia ka Tari bad ka Talwar, ka Sorkar Jylla kadei ban shah ia ki Khasi ruh ban rah ia ki tiar ialeh tynrai.
Ia kane u Samla Donald V Thabah ula kren haka jingkynmaw iaka lyngkhuh sngi iap ba 191 snem jong u Paiem Tirot Sing ha nongbah Shillong.
Haba kren ha kane ka sngi u samla Donald ula la pynkynmaw ba ha ki por ba mynshuwa u Khasi u ju rah ia ka waitlam, ka suloi tynsah, u khnam ka ryntih bad ka stieh hynrei ka Sorkar Bilat ha kato ka por ka la mana ba ki Khasi kim bit shuh ban rah ia kino-kino ki tiar ialeh tynrai.
U Samla Donald ula ong ba u Tirot Sing Syiem u dei u nongialeh laitluid ba shyrkhei ha ka First Anglo Khasi War ka ba la sdang naduh u snem 1829 bad kut haduh u snem 1833.
Ula ong ba ha kane ka jingialeh jong u Syiem Tirot Sing, u Syiem Bormanik ruh ula ieng lang ban ialeh pyrshah iaka Sorkar Bilat bad kane kala pynkyndit ia ka Sorkar Bilat ha kato ka por, namar ka jingstad bad ka jingkhlain bor jong ki watla ki don tang daki tiar ialeh tynrai.
U la pynkynmaw ba ha ki por ba mynshuwa u Khasi u ju rah ia ka waitlam, ka suloi tynsah, u khnam ka ryntih bad ka stieh, hynrei dei naduh katei ka por ka jingialeh kine ki khlawait ka jaitbynriew.
“Ka Sorkar Bilat ha kato ka por ka la mana ba ki Khasi kim bit shuh ban rah ia kino-kino ki tiar ialeh bad dei halor kata ka nongrim ba haduh mynta ba ngim don hok shuh ban rah ia ki tiar iapom tynrai” la ong u samla Donald.
“Hynrei ngi iohi ba don pat kiwei ki jaitbynriew kiba wan buhai shnong hapoh Meghalaya kiba haduh mynta ki dang ioh ban rah ia ka Tari bad ka Talwar. Lada kita ki ioh ban rah ia ki ki tiar ialeh, ka Sorkar Jylla ruh ka dei ban shah ia ki Khasi ruh ban rah ia ki tiar ialeh tynrai” ula bynrap.
