Shillong, Naitung 15 : Ka Khasi Students’ Union (KSU) ha ka sngi Ba-ar kala kynnoh ba ka Sorkar Jylla kala pynslem khnang ha ka jingpyntreikam ia ka Meghalaya Residents Safety and Security Act, 2016, haba pynpaw ba ki jingkular ba khlem lah pynurlong kila pynlong ia ki jingkren jong ka Sorkar ki bym “don jingmut shuh”.
U General Secretary ka KSU samla Reuben Najiar ula ong ba ka Sorkar kala rieh ha lyndet ka jingpynslem ban ai jingmynjur ia ka amendment bill 2019 ha ka jaka ban pyntreikam ia ka Act 2016.
“Ki kyntien kiba mih na ki Myntri Sorkar bad ki Nongialam kim don jingmut shuh namar la bun satang ki jingkular ba la khlei bad lada bun ki jingkular ki bym lah pynurlong ki pynlong ia kine ki kyntien ban duh noh ia ka jingshongdor” ong u samla Reuben.
“Ngi sngew ba ka Sorkar kam kwah satia ban pyntreikam ia ka MRSSA namar lad aka kwah ban pyntreikam, kan ym don jingeh satia ia ka ban pyntreikam. Ki ong ba ki dang ap ia ka amendment hynrei kam don eiei kaba long kongsan ha ka amendment bala tyrwa ka ban pynkhlain ia ka Act 2016” ula bynrap.
Kat kum ka jingong jong u, ka amendment 2019 ka shu bynrap ia ki kyndon pynshitom lada ai ia ki jingtip ba bakla bad kam tyrwa satia ia ka jingpynjanai kaba khraw. Ka bill ka dang ap ia ka jingai jingmynjur na u Lat bad ka President hadien ka jingtynjuh hapoh ka Iingkashari High Court.
“Pyntreikam noh ia ka MRSSA 2016. Ai ba ka Bill 2019 kan iai sahteng. Lada ka ioh jingmynjur hadien, sa pyntreikam ia ka” ula ong.
Halor ki Facilitation Centre, u samla Reuben ula pyrshah ia ka jingtyrwa ban pynlong food court ha Umling bad dawa ba baroh ki entry-exit point bala tyrwa ha u snem 2016, kynthup ha Ratacherra bad ha ri-lum Garo, dei ban pyntreikam noh mardor.
Ula kdew ia ka jubab RTI bad ka hukum ka Iingkashari High Court 2019 kaba la pynlait ia kine ki centre. Ula pynshai ruh ba ka MRSSA kam dei kaba mih pli ia ka ILP.
“Ka ILP ka dei ban iakhun ia ka jingrung kyrthep ki briew ba nabar. Ia ka MRSSA la wanrah kum ka lad pyrrkhing ba shipor. Ka jingdawa ia ka ILP ka dang iaid” ula ong.
Haba kyntait ia ka jingkhot iakren, u samla Reuben ula ong “Sngewbha wat ju khot ia ngi ban iakren namar ka dei tang ka jingpynsyrwa kai ia ka por”.
Ula dawa ia ka Sorkar ban pyntreikam shuwa ia ka MRSSA 2016, haba kdew ia ka jingpynslem ba 10 snem bad ka jingkongsan ban tehlakam ia u drok bad pynthikna ia ka jingshngain u paidbah.
“Pyntreikam shuwa ia ka principal act bad lada don kino kino ki jingduna sa pyrkhat ia ki jingpynkylla ban nang pynkhlain shuh shuh ia ka” ula ong.
 ha ka sngi Ba-ar kala kynnoh ba ka Sorkar Jylla kala pynslem khnang ha ka jingpyntreikam ia ka Meghalaya Residents Safety and Security Act, 2016, haba pynpaw ba ki jingkular ba khlem lah pynurlong kila pynlong ia ki jingkren jong ka Sorkar ki bym “don jingmut shuh”.){kind=link}