Iatehlok ka Flipkart bad ka Meghalaya ban pyniaid iew ia u sohtrun bad ki marrep hapoh ka Ri

Shillong, July 11: Ha ka jingialeh ban pyniasoh ia ki nongrep ka Meghalaya bad ki nongthied na kylleng ka ri India, ka ka Flipkart ha ka sngi Thohdieng, kala iasoi ia ka soskular bad ka Meghalaya State Agriculture Marketing Board (MSAMB) ban pyniaid iew ia ki marrep, kynthup ia u sohtrun uba pawnam ka jylla, na ki nongrep lyngba ka rynsan digital die jingdie ka jong ka.

Ia kane ka Memorandum of Understanding (MoU), la iasoi hapoh jongka Flipkart Samarth Krishi Programme, da ka jingthmu ban thaw ia ka lad ban pyniasoh ia ki nongrep bad ki iew ha ka ri bad ban pynduna ia ka jingshaniah ka jong ki tang ha ka rukom die ne jinpyniaid ha ki iew ki hat tynrai.

Ia kane ka jingiateh soskular la ia soi mar kylliang ha ka jingdon u Myntri ka Sorkar Pdeng uba khmih ia ka Tnad Development of North Eastern Region u Jyotiraditya M. Scindia bad u Myntri Rangbah ka Meghalaya u Conrad K. Sangma.

Hapoh jong katei ka jingiatreilang, ka Flipkart kan iarap ia ka State Marketing Board ban pyniasoh bad ka khaii pateng lyngba ka kor Digital da kaba ai ia ka jingbtin lynti ha kaba iadei bad ka jingdon kyrdan ia ki jingpynmih, ka jingdawa, ka rukom pynwandur ia ka jingbun bad ka rukom shalan. Katba ka MSAMB, pat kan ai jinghikai bad ban tei ia ka jingtbit ia ka kynhun ki nongrep ban pyndap pynbiang ia ka jingdawa ha ka iew.

Da kaba khot ia kane ka jingiatreilang kum ka sienjam ban pynkhlain na ki jaka rep ban pyniasoh beit beit bad ki iew ki hat, u Rajneesh Kumar u Chief Corporate Affairs Officer ka Flipkart Group, ula ong, ba ka jingkhaii pateng lyngba ka Digital ka don bha ia ka lad ban kyntiew ia ka ioh ka kot jongki nongrep da kaba pyniasoh ia ki marrep kiba la pynmih ha ka jylla bad ki nongthied ha kylleng ka ri.

U Chairman ka MSAMB u Dr Vijay Kumar D, ula ong, ba ka jingpynmih ia ki syntiew ki skud da ka jylla Meghalaya ka don bha ia ki lad ban pyniaid iew bad kane ka jingiatreilang kan iarap ha kaban kyntiew ia ka kyrdan, pynkhlain ia ki nongrep bad ban pyniar sha ki iew kiba heh.

“Ka thong ka long ban thaw ia ki lad bad ki iew kiba thymmai na ka bynta ki nongrep ka Meghalaya bad ban pynkhlain ia ka jingiashimbynta ka jylla ha ka kam rep kam riang ha ka ri” ula ong.

Kane ka sienjam kadei kaba la khmih lynti ban ai jingmyntoi khamtam eh ia nongrep ka jylla kynthup ia ki sohtrun, da kaba plie ia ka lad ban khaii ha ki iew lyngba ka e-commerce.

Ka Flipkart kala ong, ba kane ka jingiatreilang kadei shi bynta jong ka sienjam jong ka Samarth Krishi, ia kaba kadei kaba lah dep ban kyrshan da palat 10,000 ngut ki nongrep ha kylleng ka ri da kaba pyniasoh ia ki nongrep bad ki iew lyngba ka rynsan digital.

Kane ka soskular kadei kaba la khmih lynti ban pynbiang ia ki nongrep ka Meghalaya ban ioh shuh shuh ia ki iew ki hat, ka dor kaba bit ba biang bha bad ia ki kabu kiba thymmai ban die syndon ia ki mar jongki shabar jong ka thain shatei lammihngi.